Byinshi utamenye ku muramyi Richard Ngendahayo witegura gutaramira Abanyarwanda
2 mins read

Byinshi utamenye ku muramyi Richard Ngendahayo witegura gutaramira Abanyarwanda

Umuramyi w’ibihe byose Richard Ngendahayo ni umwe mu banyabigwi bagize uruhare rukomeye mu iterambere rya Gospel nyarwanda kuva mu myaka ya za 2000, igihe umuziki n’itangazamakuru bitari byagatera imbere nk’uko bimeze uyu munsi. Ni umuririmbyi ufite amateka yihariye, ubunararibonye bwimbitse, n’ubutumwa bwubaka bwagiye bufasha abantu benshi mu rugendo rwabo rwo kwizera.

Avuga ko yahamagariwe gutanga ubutumwa bufasha benshi murugendo rwabo rwo kwizera

Ngendahayo yatangiye urugendo rwe mu muziki mu 1987, atangira akirizwa mu itorero, aho se yari umuvugabutumwa. Ibi byamufashije gukurira mu murage w’indirimbo z’Imana, bituma yinjira mu itsinda ry’abaririmbyi ryo mu itorero aho yahise anagirwa umuyobozi w’iryo tsinda. Nubwo icyo gihe mu Rwanda hari studio nke kandi itangazamakuru ritaratera imbere, yakomeje urugendo rwe adacogora, yizera ko igihe kizagera ubutumwa bwe bukagera kure.

Mu mwaka wa 2001, Ngendahayo yakoze indirimbo ye ya mbere muri studio, atangira kumenyekana mu ruhando rwa Gospel. Ariko indirimbo yamuhinduriye ubuzima ni “Niwe”, indirimbo yanitiriye album yamusize mu buryo bwihariye mu mitima y’abakunzi ba Gospel mu Rwanda no hanze yarwo. Iyo ndirimbo yakomeje kuba intandaro y’iterambere rye mu muziki n’ukwamamara kwe nk’umuramyi ufite ijwi rituje, ryuzuye ubutumwa bw’ihumure n’ukwizera.

Mu mwaka wa 2008, Ngendahayo yagiye muri Amerika, aho yakomeje umurimo wo kuramya no gukora indirimbo zubaka. Nyuma y’imyaka myinshi igera kuri 17 ahakorera ivugabutumwa binyuze mu ndirimbo no gutaramira abanyarwanda batuye muri diaspora, uyu muramyi yagarutse mu Rwanda mu rwego rwo kongera guhura n’abakunzi be no kubataramira mu gitaramo gikomeye yise “Niwe Healing Concert”, kizaba ku wa 29 Ugushyingo 2025 muri BK Arena. Ni igitaramo yitezweho kugarura urwibutso ku ndirimbo ze zakunzwe cyane no kugeza ku banyarwanda ubutumwa bushya bw’ihumure yagiye akesha ubunararibonye bw’imyaka irenga 30 mu muziki agendana n’Imana.

Ngendahayo yagize ati narinkumbuye u Rwanda n’Abanyarwa byumwihariko gutaramana nabo

Uretse ibikorwa bye by’umuziki, Richard Ngendahayo afite nandi mateka akomeye benshi batazi. Yabaye umusirikare mbere yo kwinjira mu muziki w’ivugabutumwa, ndetse ari mu barwanye urugamba rwo kubohora igihugu, ibyo abona nk’umurage w’ubutwari n’ubwitange byamufashije kurushaho gukunda gukorera Imana n’igihugu. Ubu ni se w’umwana umwe w’umuhungu kandi akomeje urugendo rwo kubaka umuryango n’ivugabutumwa rishingiye ku ndirimbo.

Mu gihe Abanyarwanda bitegura kumwakira muri BK Arena, Ngendahayo akomeza gutanga icyizere ko iki gitaramo kizaba umwanya wo gusubiza imitima ku Mana, kubakira ku butumwa bwe bw’ibihe byose, no gusubira ku nshingano y’ubutumwa bwe nyakuri: guhumuriza no kubaka imitima binyuze mu ndirimbo z’Imana.

Indirimbo “Niwe” yafunguriye Richard Ngendahayo amarembo yo kuba umuramyi ukomeye

Leave a Reply

Your email address will not be published. Required fields are marked *