Tonzi agarukanye ihumure mu ndirimbo nshya yise “Uzahora Utsinda”
2 mins read

Tonzi agarukanye ihumure mu ndirimbo nshya yise “Uzahora Utsinda”

gospel– Umuhanzikazi w’inararibonye mu muziki wa Gospel mu Rwanda, Tonzi (Antoinette Iribagiza), yongeye kugaruka mu ruhando rw’indirimbo zubaka imitima, abinyujije mu gihangano gishya yise “Uzahora Utsinda.” Iyi ndirimbo nshya yashyizwe hanze taliki ya 25 ugushyingo yitezweho gushimisha abakunzi ba Gospel kubera ubutumwa buyirimo bwo guhumuriza abizera, bubibutsa ko n’iyo bahura n’ibigeragezo bikomeye, Imana ihora irikumwe nabo kandi izabatsindishiriza.

“Uzahora Utsinda” ikoze mu buryo butuje ariko bwihariye, bukurikije umwimerere wa Tonzi wo kuririmba indirimbo zigaragaza gukomera ku Mana no gutanga icyizere. Ubutumwa bw’iyi ndirimbo buganisha ku buzima bw’umuntu ushobora kuba akomeje guhangana n’ibihe biremereye, ariko agashishikarizwa gukomeza kwizera intsinzi y’Imana idashingiye ku mibereho y’uyu munsi ahubwo ishingiye ku isezerano ryayo ridahinduka.

Tonzi ni umwe mu bahanzi ba Gospel murwanda, umaze igihe kinini mumuziki. Mu rugendo rwe, yagiye arangwa n’umwihariko wo gukora indirimbo zituje, zuje ubusizi n’ubutumwa bugera ku mitima y’abantu batandukanye. Amaze kuba ikimenyabose mu ndirimbo nka “Humura”, “Ineza Yawe”, “Biratunganye”, “Amen” n’izindi nyinshi zagiye zibera ihumure abantu bari mu bihe bitandukanye by’ubuzima.

Iterambere rye mu muziki wa Gospel ryagiye rigaragarira mu buryo yubatse izina rikomeye rishingiye ku bihangano bifite ireme no mu kwagura umurimo we mu ruhando rwa Gospel nyarwanda. Afatwa nk’umwe mu bahanzi bagize uruhare rukomeye mu gutuma umuziki wa Gospel uhabwa agaciro mu Rwanda, haba mu ruhando rw’imbere mu gihugu no mu ruhando mpuzamahanga.

Kuri ubu Tonzi aracyarangwa no gukora umuziki uhamye kandi ufite intego yo kubaka no guhumuriza imitima. Indirimbo ye nshya “Uzahora Utsinda” ikomeje kumushyira ku isonga nk’umuhanzi udacogora mu gutanga ubutumwa bwubaka. Abakunzi be bakomeje kuyakira neza ku mbuga zicururizwaho umuziki, aho bakomeje kuvuga ko bakiriye ihumure mumitima yabo ndetse ko izaba imwe mu ndirimbo zizagirira benshi akamaro muri uyu mwaka.

Tonzi akomeje kuba umunyabigwi mu muziki wa Gospel, kandi ibikorwa bye bikomeza gutanga icyizere ko azakomeza kuba ijwi rifasha abantu guca mu bibazo batitiriza, ndtse banizera ko Imana “izahora itsinda.”

Tonzi mundirimbo ye uzahora utsinda

Impundu by Tonzi afatanyije na Injili borah

Leave a Reply

Your email address will not be published. Required fields are marked *