Tonzi Yasohoye Indirimbo “Uzahora Utsinda” Ihumuriza Abizera Ibibutsa Imbaraga z’Imana itajya Itererana Abayo
1 min read

Tonzi Yasohoye Indirimbo “Uzahora Utsinda” Ihumuriza Abizera Ibibutsa Imbaraga z’Imana itajya Itererana Abayo

Umuramyi w’inararibonye mu muziki wa Gospel mu Rwanda, Tonzi, yongeye kugaragaza ubuhanga n’umurava mu murimo w’Imana binyuze mu ndirimbo ye nshya yise “Uzahora Utsinda”. Ni indirimbo ikubiyemo ubutumwa bwuje ihumure, gukomeza abantu, no kubibutsa ko Imana ihora irwanirira abayo kandi ko uyishyize imbere ntacyo yikanga, kuko imutsindishiriza mu bihe byose.

Mu magambo ayigize, Tonzi agaragaza Imana nk’Umubyeyi uhohora atabara, ukomeza abantu mu bihe by’amakuba, ikabereka ko atari Imana y’ahantu ho kure ahubwo ari Imana ihaguruka, igafata ukuboko kw’abana bayo, ikabayobora inzira nyayo. Indirimbo irimo amagambo agira ati: “Ninjye Mana yawe, nzakujya imbere, nzakuyobora… Nunyura mu mazi ntazagutembana; nunyura mu muriro nzaba ndi kumwe nawe.” Aya magambo ashimangira ko uburinzi bw’Imana ari ntakuka ku muntu wese uyizera kandi akayishyira imbere.

Tonzi abinyujije muri iyi ndirimbo, yibutsa abizera ko gutsinda atari imbaraga z’umuntu ku giti cye, ahubwo ko ari umugisha uturuka ku Mana iba ibarwanirira n’iyo amaso ya kimuntu atabibona. Ni ubutumwa bwubaka, bwongerera abantu icyizere mu bihe by’ubuzima bitandukanye byaba ibyishimo cyangwa ibigeragezo.

Iyi ndirimbo ije kongera kwerekana umusanzu Tonzi akomeje gutanga mu muziki wa Gospel mu Rwanda, akaba azwiho gukora indirimbo zubaka umutima n’ubutumwa bufasha abantu gukomeza urugendo rwabo rwo kwizera. “Uzahora Utsinda” yamaze gutangira kwakirwa neza n’abakunzi b’umuziki wa Gospel ku mbuga zitandukanye, aho benshi bayivugaho ko ibahumuriza kandi ikabubakira ukwizera.

Leave a Reply

Your email address will not be published. Required fields are marked *