Love Family Choir yashyize hanze indirimbo Turirimbe imwe mu zizaba zigize umuzingo Amateka ya Yesu
Korali Love Family Choir ikorera umurimo w’Imana muri ADEPR Nduba, Paruwasi ya Gasabo mu Mujyi wa Kigali, yatangiye ubutumwa bwiza ishyira hanze indirimbo nshya yise “Turirimbe”, ibaye iya mbere mu zizaba zigize umuzingo wayo mushya witwa “Amateka ya Yesu”.
“Turirimbe” ni indirimbo yibanda ku guhimbaza no gushimira Imana ku bw’imirimo yayo mu buzima bw’abayizera, inibutsa abakristo ko ibyo Imana ibakorera bikwiye kuba ubuhamya bayisangiza abandi.
Muri iyi ndirimbo, Love Family Choir iraririmba iti: “Ku bw’imirimo yawe udukorera, turi ubuhamya bugenda,” amagambo agaragaza umutima w’indirimbo wo guhamya ineza y’Imana no kuyishimira ibyo yakoreye abayizera.
Iyi ndirimbo yakozwe mu buryo bwa Live Recording, ikaba ari intambwe ya mbere mu gusohora umuzingo “Amateka ya Yesu”, uzaba ugizwe n’indirimbo umunani. Uyu muzingo ugamije gukomeza kwamamaza Yesu Kristo no kugeza ku bantu ubutumwa bw’agakiza binyuze mu muziki.
Love Family Choir yaherekeje isohoka ry’iyi ndirimbo n’umurongo wo muri Bibiliya wo muri Zaburi 95:1, ugira uti: “Nimuze turirimbire Uwiteka, tuvugirize impundu igitare cy’agakiza kacu.”
Turirimbe ntigamije kuba indirimbo yo kwishimisha gusa, ahubwo ni ubutumwa bwo gutera abantu umwete wo guhimbaza Imana no kwemera kuba abahamya b’imirimo yayo mu buzima bwabo.
Turirimbe yamaze gushyirwa ku mbuga zitandukanye z’ikoranabuhanga, aho abakunzi b’umuziki wa Gospel bashobora kuyumva no kuyisangiza abandi. Mu z’ingenzi harimo YouTube Channel ya Love Family Choir Abanyamugisha, ndetse n’izindi mbuga nkoranyambaga.
Isohoka ry’iyi ndirimbo ni intangiriro y’urugendo rwa Love Family Choir rwo gusangiza abakunzi b’umuziki ubutumwa buri mu ndirimbo umunani zizaba zigize “Amateka ya Yesu”, umuzingo wibanda ku buzima, umurimo n’ubutumwa bwa Yesu Kristo.
