Boanerges Gospel Group yateguje igitaramo “The Heritage of Worship” Season 4

Boanerges Gospel Group yitegura igitaramo “The Heritage of Worship” Season 4Boanerges Gospel Group, itsinda ry’abaramyi bakorera muri Bethesda Holy Church ku Gisozi mu Mujyi wa Kigali, rikomeje kwagura umurimo wo kuramya no guhimbaza Imana binyuze mu ndirimbo n’ibitaramo byagutse.

Iri tsinda ryamaze kumenyekana mu muziki wa Gospel mu Rwanda, bitewe n’uburyo rihuza amajwi meza, injyana zitandukanye n’ubutumwa bwubaka imitima y’abakunzi b’umuziki wa gikristo.Mu itangazo ryashyizwe ahagaragara, Boanerges Gospel Group yatangaje ko iri kwitegura igitaramo gikomeye cyiswe “The Heritage of Worship” Season 4, kizaba ku Cyumweru tariki ya 22 Ugushyingo 2026, muri Bethesda Holy Church i Gisozi. Iki gitaramo kizatangira saa cyenda z’amanywa kugeza saa moya z’umugoroba, kikaba kigamije guhuriza hamwe abakunzi b’amasengesho n’abifuza guhimbaza Imana.Iki gitaramo kizayoborwa mu buryo bw’ivugabutumwa na Pastor Jackson.

Abategura iki gikorwa bagaragaje ko ari umwanya wo gusengera hamwe, kuramya Imana no kongera guhuza abakristo binyuze mu ndirimbo n’ubutumwa bwiza.Boanerges Gospel Group yashinzwe tariki ya 24 Ukwakira 2004 na Niwemugeni Albine, uzwi nka Sarah. Iri tsinda ryatangiriye ku baririmbyi bari hagati ya 15 na 20, ariko uko imyaka yagiye ihita rikomeza kwaguka, kugeza ubu rikaba rifite abaririmbyi n’abanyamuryango barenga 65 bakora umurimo waryo.Izina Boanerges rikomoka mu Ivanjili ya Mariko 3:17, aho risobanura “Abana b’Inkuba”.

Mu muziki waryo, iri tsinda rizwiho guhuza imiririmbire ya korali ishingiye ku majwi ahuza neza n’injyana zigezweho, umuziki nyafurika wo kuramya no guhimbaza Imana, bigatuma ibitaramo byaryo birangwa n’imbaraga n’uburyohe bwihariye.Mu ndirimbo zakoze ku mitima y’abakunzi ba Boanerges Gospel Group harimo “Ntawamenya”, “Humura”, “Ijwi”, “Uhimbazwe Iteka” na “Amashimwe”. Indirimbo “Humura” ifite ubutumwa bwo guhumuriza abantu, ishingiye ku murongo wo muri Yesaya 50:7, mu gihe “Ijwi” ari imwe mu ndirimbo zigaragaza ubushobozi bw’iri tsinda mu kuramya Imana mu buryo bwimbitse.

Izi ndirimbo ziboneka ku mbuga zitandukanye zicishwaho umuziki, zirimo YouTube, Audiomack na SoundCloud.“The Heritage of Worship” ni kimwe mu bikorwa by’ingenzi Boanerges Gospel Group imaze kumenyekaniraho, aho ihuriza hamwe abakristo mu bihe byo kuramya no guhimbaza Imana. Iki gitaramo kigiye kuba mu gihe amakorali n’amatsinda ya Gospel mu Rwanda akomeje gutegura ibikorwa binini by’ivugabutumwa, bigamije kugeza ubutumwa bwiza ku bantu benshi no gukomeza kubaka umuco wo guhimbaza Imana.Boanerges Gospel Group ikomeje gukoresha imbuga nkoranyambaga, cyane cyane YouTube, mu gusangiza abakunzi bayo indirimbo, amashusho y’ibitaramo n’ibikorwa by’umurimo w’ivugabutumwa. Abifuza amakuru arambuye ku gitaramo “The Heritage of Worship” Season 4 bashobora gukurikirana imbuga z’iri tsinda cyangwa bakifashisha nimero ya telefoni, +250 788 253 673.

Kuva ku baririmbyi 20 kugeza ku barenga 65: Urugendo rwa Boanerges Gospel Group mu myaka 22