Ese kugira incuti magara mudahuje igitsina byangiza urukundo?
5 mins read

Ese kugira incuti magara mudahuje igitsina byangiza urukundo?

Kugira incuti magara mudahuje igitsina bishobora guteza ishyari n’impungenge hagati y’abakundana, cyane cyane iyo umwe yumva ko iyo ncuti ihabwa umwanya ukwiye guhabwa umukunzi. Icyakora, abashakashatsi mu bijyanye n’imibanire bagaragaza ko ikibazo nk’iki kidakemurwa no guhatira umuntu guhitamo hagati y’umukunzi n’incuti, ahubwo ko ibiganiro, ubwizerane n’imipaka yumvikanyweho bishobora gufasha.

Ni ikibazo abantu benshi bahura na cyo mu rukundo. Umuntu ashobora kuba afite incuti magara bamaze igihe kirekire basabana, ariko akaza kubona umukunzi utishimira uko ubwo bucuti buhagaze.

Umukunzi ashobora kwibaza impamvu mugenzi we amarana igihe kinini n’iyo ncuti, cyangwa agatangira gukeka ko hari ibirenze ubucuti busanzwe hagati yabo. Ku rundi ruhande, ufite iyo ncuti ashobora kumva ko adakwiye kuyitandukanya na we kubera ko yinjiye mu rukundo.

Ubushakashatsi bwerekana iki ku bucuti n’ishyari?

Ubushakashatsi bwakozwe na Eletra Gilchrist-Petty na Lance Kyle Bennett bwibanze ku bucuti bwa hafi hagati y’abantu badahuje igitsina n’ingaruka bushobora kugira ku ishyari mu rukundo.

Ubwo bushakashatsi bwakorewe ku bantu 346, bugaragaza ko uko abantu babona ubucuti bw’abantu badahuje igitsina bishobora kugira uruhare mu buryo ishyari rigaragaramo mu rukundo.

Abantu bari hafi yo gushyingirwa bagaragaje imyumvire mibi kurusha abandi ku bijyanye n’ubucuti bwa hafi hagati y’abantu badahuje igitsina. Abashakashatsi kandi bagaragaje ko uburyo umuntu yumva kandi agaragazamo ishyari bushobora kugira ingaruka nziza cyangwa mbi ku mubano.

Ibi ntibivuze ko kugira incuti mudahuje igitsina ari bibi cyangwa ko buri bucuti bushobora gusenya urukundo. Ahubwo bigaragaza ko bushobora guteza ibibazo igihe umwe mu bakundana yumva ko hari undi muntu ushaka gufata umwanya wihariye mu buzima bw’umukunzi we.

Kuki umuntu agira ishyari mu rukundo?

Ishyari rishobora guterwa no gutinya gutakaza umukunzi, kubura icyizere cyangwa kumva ko hari undi muntu ushobora kwiharira umwanya umuntu yari asanzwe afite mu buzima bw’uwo bakundana.

Ubundi bushakashatsi bwakorewe ku bantu 261 bari mu rukundo bwagaragaje ko abantu bagira impungenge nyinshi ku hazaza h’umubano wabo bashobora kugira ishyari rikomeye iyo bumva ko batizerana bihagije n’abo bakundana.

Ibi byerekana ko ikibazo gishobora kuba kitarebana gusa n’incuti magara, ahubwo ko gishobora no kugaragaza ibibazo by’ubwizerane hagati y’abakundana.

Iyo umuntu atishimiye ubucuti umukunzi we afitanye n’undi muntu, ni ngombwa ko abivuga mu buryo bwubaka aho kubihindura intandaro y’amakimbirane.

Urugero, aho kuvuga ati: “Sinshaka ko wongera kuvugana na we.” Ashobora kuvuga ati: “Iyo mbabonye mumarana umwanya munini, numva mfite impungenge. Ndashaka ko tuganira tukareba uko twabyitwaramo.”

Ubu buryo bufasha buri wese kuvuga uko yiyumva no kumva undi, aho guhatana cyangwa gusaba mugenzi we guhitamo hagati y’incuti n’umukunzi.

Ese umukunzi afite uburenganzira bwo kugusaba kureka incuti yawe?

Iki ni ikibazo gikomeye kuko abantu bagira imyumvire n’amasezerano bitandukanye ku bijyanye n’urukundo. Icyakora, hari itandukaniro hagati yo kugaragaza ko ikintu kikubangamiye no gutegeka umukunzi wawe abantu agomba kugira incuti.

Umuntu ashobora kubwira mugenzi we ko hari imyitwarire imutera impungenge, bityo bakayiganiraho bagashaka igisubizo. Ariko kumubwira ngo “Njye cyangwa we. Hitamo.” bishobora guhindura ikibazo cy’ishyari uburyo bwo kumugenzura.

Ku rundi ruhande, ufite incuti magara na we akwiye gusuzuma niba imyitwarire ye itabangamira umubano we w’urukundo.

Ashobora kwibaza ibibazo bitandukanye: Ese hari ibyo mpisha umukunzi wanjye ku bijyanye n’iyi ncuti? Ese iyi ncuti nyiha umwanya uruta uwo mpa umukunzi wanjye? Ese nyibwira ibintu byose by’umubano wanjye? Ese hari imyitwarire yanjye ishobora gutuma umukunzi wanjye agira impungenge zumvikana?

Ikindi kibazo umuntu yakwibaza ni ukumenya niba yakwemera ko umukunzi we agirana n’undi muntu ubucuti bungana n’ubwo we afitanye n’incuti ye magara.

Ibi bibazo bifasha buri wese kwisuzuma no gutandukanya ishyari ridafite ishingiro n’impungenge zishobora kuba zifite impamvu.

Imipaka n’ibiganiro byubaka bishobora kurinda urukundo

Kuba umuntu yarinjiye mu rukundo ntibivuze ko agomba guhagarika ubucuti yari asanganywe n’abandi bantu. Icyakora, ni ngombwa kumenya uko yitwara kugira ngo yubahe umukunzi we kandi arinde umubano wabo.

Abakundana bashobora kumvikana ku mipaka ibafasha gukomeza kubana neza. Ibyo bishobora kuba ukwirinda guhishanya, kubahana, kugena umwanya bahuriraho no kutagira ubucuti bwabo isoko yo guhemukirana cyangwa gutesha agaciro umukunzi.

Icy’ingenzi ni uko iyo mipaka yumvikanwaho n’impande zombi, aho kuba amategeko ashyirwaho n’umuntu umwe.

Iyo abantu baganira ku bibazo bibabangamiye, bakumva ibitekerezo bya buri wese kandi bakirinda gushinjanya, bagira amahirwe menshi yo gukemura amakimbirane batabangamiye umubano wabo.

Icyo abakundana bakwiye kuzirikana

Kugira incuti magara mudahuje igitsina ntibihita bivuga ko urukundo ruri mu kaga. Ariko nanone, gukomeza ubwo bucuti bisaba kubaha umukunzi no kumwereka ko umwanya afite mu buzima bwawe udasuzugurwa.

Abakundana bakwiye kumenya ko icyizere kitubakwa no kubuza mugenzi wawe kugira incuti, ahubwo gishingira ku kuri, kubahana, ibiganiro no kwirinda imyitwarire ishobora gutera impungenge zidakenewe.

Bityo, aho kwibaza niba umuntu akwiriye guhitamo hagati y’incuti magara n’umukunzi, icy’ingenzi ni ukumenya uko yakomeza ubwo bucuti yubaha n’umubano w’urukundo arimo.

Leave a Reply

Your email address will not be published. Required fields are marked *