Kuva ku guhurira mu rusengero kugera ku isezerano: Urugendo rw’urukundo rwa Gideon Kirui na Tabea Jasmin rwabagejeje ku gushakana
4 mins read

Kuva ku guhurira mu rusengero kugera ku isezerano: Urugendo rw’urukundo rwa Gideon Kirui na Tabea Jasmin rwabagejeje ku gushakana

Inkuru ya Gideon Kirui n’umugore we w’Umunyadage, Tabea Jasmin Schumann, igaragaza ko urukundo rufite imizi mu Ivanjili rushobora gutsinda inzitizi zose, rukubaka ubumwe burenze imbibi z’ibihugu n’imyumvire y’abantu.

Mu gihe isi ikomeje kugaragaramo amacakubiri ashingiye ku moko, ku muco no ku mateka, inkuru ya Gideon Kirui, umusore wo mu Karere ka Nakuru muri Kenya, n’umugore we w’Umunyadage Tabea Jasmin Schumann, ikomeje gutanga isomo rikomeye ry’urukundo rushingiye ku kwizera Imana, kwihangana no gukundana mu kuri.

Urugendo rwatangiriye mu rusengero

Urugendo rwabo rwatangiriye mu rusengero kure y’iwabo, rugarukira ku rushako rwahuje imiryango, ruhamya ko urukundo rufite Imana nk’ishingiro rushobora gutsinda byose.

Gideon Kirui, ukomoka mu Mudugudu wa Boror mu Murenge wa Rongai, yahuye na Tabea mu mwaka wa 2024 mu Mujyi wa Tel Aviv muri Israel, aho yari arimo gukurikirana amasomo ya kaminuza mu bijyanye n’iterambere rirambye.

Tabea, ukomoka mu Mujyi wa Hannover mu Budage, na we yari muri Israel akorana n’umuryango wa gikirisitu. Bahuriye mu rusengero rwa Hillsong Church, aho ubucuti bwabo bwatangiriye, bugenda bukurira mu bwiyunge bw’imyemerere n’indangagaciro, buhinduka urukundo rwimbitse rwaje kuganisha ku kubana.

Gideon yabisobanuye agira ati: “Twahuriye mu materaniro yo mu rusengero, duhita tuba inshuti. Bidatinze, ubwo bucuti bwaje kuvamo urukundo, none ubu bwarakuze bugera ku rushako.”

Ibyo avuga bigaragaza ko urukundo rwabo rwubakiye ku bufatanye mu kwizera no ku ndangagaciro basangiye.

Imbogamizi z’umuco n’imyumvire ya gakondo

Nk’uko Gideon yabitangaje, urwo rukundo rwabo ntirwaje mu buryo bworoshye. Yavuze ko akomoka mu muryango n’umuryango ufite imyumvire yo gukomera kuri gakondo, aho yari yaraburiwe mbere yo kujya kwiga ko atazagarukana umugore w’umuzungu.

Ati: “Nkomoka mu muryango uharanira cyane umuco gakondo, kandi nari narabwiwe mbere yo kugenda ko nzitonda ku byo nakora.”

Ku rundi ruhande rwa Tabea, hari impungenge zishingiye ku byumvikanaga ku bashakanye baturuka mu moko atandukanye, ndetse n’imyumvire mibi ikunze kuvugwa ku gushyingiranwa kw’abazungu n’abirabura.

Gideon yavuze ati: “Na we yari yarumvise inkuru nyinshi mbi n’imyumvire ishingiye ku ivangura ivugwa ku bazungu bashakana n’abirabura, ibyo byatumaga urugendo rwacu rutoroha.”

Icyakomeje kubahuza no kubaha imbaraga zo kudacika intege ni ukwizera kwabo kwa gikirisitu. Bombi bemeje ko iyo batishingikiriza ku Mana, urukundo rwabo rutari kuramba. Mu masengesho, mu biganiro byubaka no mu kwihangana, bahisemo guhagarara ku ntego yo gukundana no kurwanira umubano wabo, aho gucibwa intege n’imbogamizi z’abantu.

Kwakirwa n’imiryango n’intambwe igana ku rushako

Uko iminsi yicumaga, imiryango yabo yatangiye kugenda yumva neza icyabahuza. Mu Ugushyingo 2025, Gideon yasubiye muri Kenya ari kumwe na Tabea kugira ngo akorerwe umuhango wo kwerekanwa mu muryango, ari wo wahindutse intambwe ikomeye mu kwakirwa no kwemerwa.

Gideon yagize ati: “Binyuze muri Kristu no ku bufasha bw’ababyeyi bacu, inshuti n’abayobozi b’itorero, twashoboye gutsinda izo nzitizi z’umuco n’imyumvire.”

Binyuze mu biganiro, mu masengesho no mu bufasha bw’abayobozi b’amadini n’inshuti, imiryango yombi yaje kwakira uru rukundo, biyemeza kubashyigikira.

Ku itariki ya 3 Mutarama 2026, Gideon Kirui na Tabea Jasmin Schumann basezeranye mu muhango mwiza wabereye i Ngata mu Karere ka Nakuru. Uwo munsi waranzwe n’ibyishimo n’amarangamutima menshi, aho imiryango yombi yitabiriye igikorwa cyahurije hamwe abatarajyaga imbizi.

Umugeni yari yambaye ikanzu y’umweru iciriritse ariko itatse ubwiza, mu gihe umugabo yari yambaye ikositimu y’ubururu igaragaza icyizere n’ishema. Abakobwa n’abasore bari mu itsinda ry’abageni batanze isura y’ubwiza n’ubumwe.

Ubutumwa bw’urukundo butagira umupaka

Gideon yashimiye by’umwihariko itorero Gospel Outreach Church ryo muri Salgaa ryayoboye umuhango wo gushyingirwa, anashimira inshuti n’abavandimwe bo mu bihugu bitandukanye birimo Israel, Ubudage, Australia na Kenya bakomeje kubashyigikira, n’abakurikiye uwo muhango bifashishije ikoranabuhanga.

Uru rukundo rwa Gideon na Tabea rutanga ubutumwa bukomeye bwa gikirisitu: ko muri Kristu, nta Muyahudi cyangwa Umugiriki, nta mwirabura cyangwa umuzungu, ahubwo urukundo rufatanye n’Imana rubasha guhuza abantu, rukabambura ubwoba n’ivangura, rukubaka umuryango uhamya ko urukundo nyakuri rutagira umupaka.

Inkuru yabo ikomeje kubera urugero abashakanye n’urubyiruko bahura n’imbogamizi zishingiye ku muco n’imyumvire, igaragaza ko ukwizera, kwihangana n’urukundo byubakiye ku Mana bishobora guhindura amateka.

Leave a Reply

Your email address will not be published. Required fields are marked *