Emmanuel Dangana wahoze ari Senateri ku myaka 70 yakoze ubukwe n’umukobwa w’imyaka 18

Uwahoze ari Umusenateri uhagarariye Kogi East muri Nigeria, Emmanuel Dangana Ocheja, w’imyaka 70, yakoze ubukwe n’umukobwa witwa Winifred ufite imyaka 18, ishyingiranwa ryakuruye impaka zitandukanye ku mbuga nkoranyambaga kubera itandukaniro ry’imyaka irenga 50 hagati y’aba bombi.

Amashusho y’ibirori by’ubukwe bw’uyu munyapolitiki n’umugore we mushya yakomeje gukwirakwira ku mbuga nkoranyambaga mu minsi ishize, agaragaza Ocheja na Winifred bishimye ndetse babyina mu birori byitabiriwe n’abavandimwe, inshuti n’abashyitsi.

Nk’uko ikinyamakuru TheCable Lifestyle cyabitangaje, Ocheja yakoze umuhango w’ubukwe bwa gakondo ku wa 13 Nzeri 2026, ukurikirwa n’ubukwe bwo gusaba no gusezerana bwabaye ku wa 19 Nzeri 2026.

Mu mashusho yakwirakwijwe, Ocheja agaragara yambaye imyambaro ijyanye n’iya Winifred ubwo bari mu birori bya gakondo, bombi babyina mu gihe abashyitsi babareba ndetse bakabifuriza ibyishimo.

Ku mafoto y’ubukwe bwo ku wa 19 Nzeri, Ocheja agaragara yambaye ikoti ry’umweru n’ipantalo, mu gihe umugore we yari yambaye ikanzu y’ubukwe.

Bamenyanye binyuze ku bucuti bw’umuryango

Winifred bivugwa ko yari asanzwe aziranye n’umuryango wa Ocheja, ndetse amakuru yatangajwe avuga ko yari umwuzukuru w’inshuti magara y’uyu wahoze ari Senateri. Ibyo ni byo byatumye bombi barushaho kumenyana, bikaza kurangira bafashe icyemezo cyo kubana nk’umugabo n’umugore.

Iri shyingiranwa ryakuruye ibitekerezo bitandukanye ku mbuga nkoranyambaga, ahanini bitewe n’imyaka y’aba bombi. Ocheja afite imyaka 70, mu gihe Winifred afite 18, bivuze ko hagati yabo harimo itandukaniro ry’imyaka irenga 50.

Nubwo amashusho y’ubukwe yakwirakwiye cyane, nta makuru menshi yigeze atangazwa ku buzima bwite bwa Winifred cyangwa ku buryo bwimbitse ku mubano wabo mbere y’ubukwe.

Ocheja ni muntu ki?

Emmanuel Dangana Ocheja ni umunyamategeko akaba n’umunyapolitiki ukomoka muri Leta ya Kogi, aho yavukiye mu gace ka Idah. Yize amategeko muri Ahmadu Bello University, ABU, Zaria, mbere yo kwinjira muri politiki.

Ocheja yabaye umwe mu bagize Inteko Ishinga Amategeko ya karindwi ya Nigeria kuva mu 2011 kugeza mu 2015, ahagarariye Kogi East muri Sena ku itike y’Ishyaka Peoples Democratic Party (PDP). Amakuru y’amateka ya Sena agaragaza ko yatorewe uwo mwanya mu matora yo mu 2011, ndetse akaba yararangije manda ye mu 2015.

Nyuma yaho, Ocheja yavuye muri PDP maze yinjira mu Ishyaka All Progressives Congress (APC), ariko ntiyongera gushaka umwanya wa Sena mu matora yo mu 2019, ahubwo akomeza ibikorwa bye mu mwuga w’amategeko.

Ubukwe bwe na Winifred bwongeye gutuma izina rye rivugwa cyane mu itangazamakuru rya Nigeria, cyane cyane kubera itandukaniro rinini ry’imyaka hagati y’aba bombi.