“Humura” Indirimbo Nshya Ya Charles Kagame yashyize hanze Yitiriye album Ye
1 min read

“Humura” Indirimbo Nshya Ya Charles Kagame yashyize hanze Yitiriye album Ye

Umuhanzi Charles Kagame yatangije ku mugaragaro urugendo rwo kumurika album ye nshya y’indirimbo umunani yise Humura, atangira asohora indirimbo yitiriye Album, yamaze kujya hanze mu majwi n’amashusho.

Uyu muhanzi w’umunyarwanda wamamaye cyane mu ndirimbo zo kuramya no guhimbaza Imana, Charles Kagame, akunzwe cyane kubera ubuhanga bwe mu ndirimbo zifasha abantu mu mwuka no mu buzima bwa buri munsi, yashyize hanze indirimbo nshya yise Humura, akaba ari nayo yitiriye album nshya ateganya kumurika mu gihe cya vuba.

Iyi ndirimbo, yasohotse mu buryo bw’amajwi n’amashusho, ni yo yabimburiye izindi zirindwi zigize umuzingo mushya w’indirimbo umunani uyu muhanzi amaze iminsi ateguza abakunzi be. Charles Kagame yatangaje ko izindi ndirimbo zigize iyi album nshya zatangiye gutunganywa, kandi ko mu minsi iri imbere zizagenda zisohoka ku buryo abafana bazakomeza gukurikirana urugendo rwe rwa muzika mu buryo bwimbitse.

Iyi album izaba ifite intego yo gutanga ubutumwa bw’ihumure, ibyiringiro no gukomeza imitima y’abanyantege nke, cyane cyane muri ibi bihe abantu bahura n’ingaruka z’ibibazo bitandukanye byugarije isi n’imibereho ya muntu.

Indirimbo Humura yamaze gushyirwa ku mbuga zitandukanye zitanga umuziki, ndetse amashusho yayo akomeje kwakirwa neza n’abakunzi ba Charles Kagame.

Uru ni urugendo rushya mu muziki w’uyu muhanzi wamamaye cyane mu ndirimbo Amakuru, yamuhesheje abakunzi benshi mu Rwanda no hanze yarwo. Abakunzi b’indirimbo zo kuramya byitezwe ko bazakira kandi bagakurikirana indimbo z’uyu muhanzi nk’uko basanzwe babikora, dore ko akunzwe n’abatari bake.

Leave a Reply

Your email address will not be published. Required fields are marked *