Urukundo N’uburinzi Bwa Yesu, Ubutumwa Bukubiye Mu Ndirimbo Nshya Ya Alarm Ministries “Aragukunda”
Korali Alarm Ministries yasohoye ku mugaragaro indirimbo nshya yise Aragukunda, irimo ubutumwa bwo guhumuriza no gukomeza imitima, ishingiye ku magambo yo kongera kwizera no kugira ukwizera gukomoka ku Mana.
Korali Alarm Ministries, imwe mu makorali akunzwe cyane mu muziki wo kuramya no guhimbaza Imana mu Rwanda no mu karere, yasohoye indirimbo nshya yise Aragukunda kuri uyu wa 21 Ugushyingo 2025. Iyi ndirimbo nshya yiganjemo amagambo y’ihumure, gushima no kwiyambaza Imana, inakomoza ku rukundo ruhoraho rwa Yesu rugaragarira mu buzima bw’umukristo.
Mu magambo yayo, Korali itangira igaragaza uburyo yuzuye ishimwe n’amahoro menshi kubera ko Uwiteka yateze amatwi gusenga kwayo, akumva ibigeragezo bahuye na byo.
Bati: “Mu mwijima mwinshi wo munzira, yambereye umucyo…,” amagambo agaragaza ko Imana yakomeje kuyobora mu bihe bikomeye by’amakuba n’urujijo.
Amagambo avuga ngo “maze mbwira umutima wanjye nti, tuza we kugira ubwoba ngo wihebe… Uri uwanjye, Sinzakureka, nzagukiza, Naguhetse, ukiri munda, Kuzageza imvi zibaye uruyenzi.
Aya magambo abumbatiye ubutumwa bukomeye bwo guhumuriza, kutijujuta no kutemera gutsindwa n’ibigeragezo, kuko nk’uko indirimbo ibivuga, umwami Yesu akunda abantu. Agaragaza ko kandi isezerano ry’Imana ridasaza kandi ko ibana na muntu mu bihe byose.
Alarm Ministries ni korali imaze kumenyekana hano mu Rwanda ndetse inakunzwe cyane kubera indirimbo zayo nziza. Ifite izindi ndirimbo nyinshi zirimo: Iyi ntwari ni nde?, Humura nshuti, Yesu arakiza, Iyo niyo Data n’izindi, zose wasanga ku muyoboro wayo wa Youtube inyuzaho ibihangano byayo.
Indirimbo Aragukunda yitezweho kwakirwa neza n’abakunzi ba Alarm Ministries, ndetse ikaba yongeye kwerekana umwihariko w’iyi korali mu gutanga ubutumwa bwimbitse, bwimakaje ihumure n’ukwizera muri ubu buzima bwuzuye imihangayiko n’ibibazo.
Reba indirimbo Aragukunda
