“Nicyo Gihe” Ya The Salt Worship Team Ministries Ikomeje Gukangura Imitima
The Salt Worship Team yongeye gusohora I ndirimbo nshya ikangurira abantu gukorera Imana, ikomeje kwigarurira abakunzi b’indirimbo zo guhimbaza Imana.
Abantu benshi basinziriye mu buryo bw’Umwuka bakomeje gukanguka binyuze mu ndirimbo nshya yitwa Nicyo gihe y’itsinda The Salt Worship Team Ministries rikorera i Bruxelles mu mu Bubiligi. Iyi ndirimbo yubatse imitima ya benshi, nk’uko bigaragara mu bitekerezo by’abayumvise n’abayirebye ku mbuga zitandukanye.
The Salt Worship Team Ministries yatangiye muri 2022 bivuye ku iyerekwa Imana yahaye umwe mu bashinze iri tsinda, rikomora ku ijambo ryo muri Matayo 5:14 rivuga riti: “muri umucyo w’isi”. Nk’uko umunyu ugira umumaro mu buzima bwa buri munsi, Imana ishaka ko abakristo bagira umumaro mu gihe nk’iki.
Nyuma yo gushyira hanze iyi ndirimbo, abakunzi ba The Salt Worship Team bagaragaje ko bakeneye ibindi bihangano bishya kuko bayibonye nk’iyabashyizemo imbaraga nshya. Pastor Gasha, uyobora iri tsinda ku butumwa yashyize ku rubuga rwe, yavuze ko bafite imishinga migari, harimo gutangira ibitaramo binini byo kurushaho kwamamaza Kristo no gutumira abandi bahanzi.
The Salt Worship Team ifite imikoranire myiza na ATV mu irushanwa The Salt Talent Competition, aho abahanzi bashya bahabwa amahirwe yo gutangaza ubutumwa bwiza binyuze mu mpano zabo.
Uretse ivugabutumwa, iri tsinda rizwiho ibikorwa by’umusamariya mwiza. Bafasha abana bo mu miryango ikennye babaha ibikoresho by’ishuri, bagafasha imfubyi, ndetse bagasubiza mu ishuri abacikishije. Bagira uruhare kandi mu bikorwa byo gutera inkunga baha amatungo magufi ku miryango ikennye.
The Salt Worship Team ifite abaririmbyi batandukanye baririmba ku giti cyabo indirimbo zo kuramya no guhimbaza Imana. Bamaze gushyira hanze indirimbo ebyiri: Umwiringiye ndetse na Nicyo gihe, zose zigaragaza urwego rwihariye rwo gukorera Imana.
Kuri ubu, iri tsinda rihagaze nk’itsinda rije kugira uruhare mu kwamamaza Kristo ku rwego mpuzamahanga no kuzamura impano z’urubyiruko, mu gihe rikomeje gutanga ubutumwa bw’ihumure no kutibagirana mu mitima ya benshi.
