“Agira umutima mwiza, yaje no kudusura muri gereza.” Jangwani Frank Yashimagije Israel Mbonyi
2 mins read

“Agira umutima mwiza, yaje no kudusura muri gereza.” Jangwani Frank Yashimagije Israel Mbonyi

Umuvugizi wa APR FC yagaragaje icyubahiro gikomeye afitiye Israel Mbonyi, amuvuga nk’umugabo ufite impano n’umugisha udasanzwe yahawe n’Imana akivuka

Mu kiganiro cyihariye kuri One on One ya Narababwiye TV, umuvugizi wa APR FC Jangwani Frank, uzwi cyane nka Sir Jangwanovic, yagarutse ku muramyi Israel Mbonyi mu magambo akomeye, avuga ko impano ze n’ubuhanga bwe bishobora kuba byakomotse ku bwoko bw’umugisha w’Imana yahawe kuva akivuka.

Jangwani yabivuze ubwo yerekwaga amafoto y’ibyamamare bitandukanye, maze asabwa kuvuga ibintu bitatu kuri buri muntu. Ageze kuri Israel Mbonyi, yavuze ko uyu muramyi afite impano idasanzwe arusha abandi benshi.

Yagize ati: “Israel Mbonyi namumenye niga i Bugande, we aba mu Buhinde. Hari umuntu wari utunze amajwi y’indirimbo ze. Hari indirimbo navuga ko ari iy’ibihe byose mu ndirimbo za Gospel ndetse no mu zindi izo ari zo zose. Yitwa “Ku Musaraba”. Narayikunze, bimbera nk’itegeko kuyumva buri joro uko ngiye kuryama na buri gitondo uko mbyutse.”

Jangwani yavuze ko Mbonyi ari umuntu ufite impano nyinshi mu buzima: ubwenge, amafaranga, ubuhanga mu ndirimbo no mu zindi ngeri z’ubuzima, ndetse akaba akunzwe n’abantu b’ingeri zose kubera ubupfura n’ubugwaneza bwe.

Ati: “Israel Mbonyi ni umugabo w’umuhanga cyane. Akundwa n’abantu b’ingeri zose, aca bugufi, afite amafaranga, afite ubwenge, yarize, azi Icyongereza… ni urugero rw’umuntu ufite byose. Araremereye!”

Aganira na Narababwiye TV, Jangwani yavuze ko ibi byose Mbonyi abikesha umugisha w’Imana waba waramugezeho akivuka. Ati: “Birashoboka ko akivuka, hari Marayika Imana yohereje akamukoraho akamubwira ati: Ibintu byose uzakora bizaguhire.”

Nubwo amagambo ye asa n’asesengura impano zidasanzwe za Mbonyi, Jangwani yanashimangiye ko umuramyi amenyereweho umutima mwiza kuko yanagiye kubasura ubwo bari muri gereza.

Ati: “Agira umutima mwiza, yaje no kudusura muri gereza.”

Israel Mbonyi, washimagijwe muri iki kiganiro, ubu ari mu myiteguro y’igitaramo cya Noheli “Icyambu 4” kizabera muri BK Arena ku wa 25 Ukuboza 2025, ndetse nyuma akazataramira i Rubavu ku wa 1 Mutarama 2026, ibitaramo bishyigikiwe na sosiyete y’itumanaho yo mu Rwanda.

Mbonyi akomeje kwigaragaza nk’umwe mu bahanzi bakunzwe cyane mu karere, aho indirimbo ye “Nina Siri” imaze kurebwa inshuro zirenga miliyoni 86 kuri YouTube, naho abamukurikira bakaba barenga miliyoni ebyiri, bikamugira umuhanzi wa mbere mu Rwanda ugera kuri uyu mubare.

Umuvugizi wa APR FC, Jangwani Frank, yemeza ko Israel Mbonyi ashobora kuba yarakozwe ku gahanga na Marayika akivuka

Leave a Reply

Your email address will not be published. Required fields are marked *