Muri shampiyona y’Ubwongereza umukinnyi yahawe ikarita itukura nyuma y’uko akubise umukinnyi bakinana
Idrissa Gana Gueye ukinira Ikipe ya Everton yahawe ikarita itukura mu minota ya mbere y’umukino batsinzemo Manchester United, nyuma yo gukubita mugenzi we Michael Keane ku wa Mbere.
Byabaye ubwo Bruno Fernandes yari ahushije uburyo bwashoboraga kuvamo igitego, Gueye na Keane batangira gushyamirana ku munota wa 13.
Amashusho y’umukino yagaragaje myugariro Keane asunika Gueye inshuro ebyiri mbere y’uko uyu Munya-Sénégal amukubita urushyi.
Umunyezamu wa Everton ukomoka mu Bwongereza, Jordan Pickford, yatandukanyije aba bakinnyi bombi mbere y’uko umusifuzi Tony Harrington yereka Gueye ikarita itukura kubera imyitwarire mibi.
Nubwo Everton yasigaye ari abakinnyi 10 mu kibuga, ntibyayibujije gufungura amazamu ku munota wa 29, ku gitego cyatsinzwe na Kiernan Dewsbury-Hall, ndetse birangira ari icyo kibonetse muri uyu mukino wabereye kuri Old Trafford.
Nyuma y’umukino, Idrissa Gueye uri gukina muri Everton ku nshuro ya kabiri, yasabye imbabazi binyuze mu butumwa yashyize ku mbuga nkoranyambaga.
Ati “Mbere na mbere ndashaka gusaba imbabazi mugenzi wanjye dukinana Michael Keane. Ndumva uburemere bw’uburyo nitwaye. Ndisegura kandi kuri bagenzi banjye, abatoza, abafana n’ikipe.”
Yongeyeho ati “Ibyabaye ntaho bihuriye n’indangagaciro zanjye. Amarangamutima ashobora kuzamuka, ariko na none ntacyo nabona gisobanura iriya myitwarire. Nzakora uko nshoboye ntibizongere kuba.”
Mu kiganiro n’abanyamakuru, Umutoza wa Everton, David Moyes, yavuze ko abakinnyi bakomeye amashyi Gueye ubwo yasabiraga imbabazi hagati yabo.
Yongeyeho ko akunda kubona abakinnyi be barwana kuko bituma buri wese yumva ko hari icyo atakoze neza.
Itegeko rijyanye n’imyitwarire mibi rivuga ko gukubita umukinnyi muhanganye cyangwa undi muntu uwo ari we wese ku mutwe cyangwa mu maso, ukoresheje ukuboko cyangwa ikiganza, bibarwa nk’ikosa rihanishwa ikarita itukura keretse igihe imbaraga zakoreshejwe zari nke cyane ku buryo zitafatwa nko kumubabaza.
Ku rundi ruhande, Umutoza wa Manchester United, Ruben Amorim, we yagaragaje ko atemeranya n’iyi karita itukura.
Ati “Dushobora kurwana n’abo dukinana na bo. Ndabizi ko bidakwiye kubera ko ari ko umusifuzi yabivuze ariko simbyemera.”
Urubuga Opta rugaragaza ko ari ubwa gatatu (kuva mu 2000/01) umukinnyi ahawe ikarita itukura muri Premier League kubera gushyamirana na mugenzi we bakinana.
Abandi byabayeho ni Lee Bowyer na Kieron Dyer bakiniraga Newcastle ubwo bari bahuye na Aston Villa mu 2005 – na Ricardo Fuller warwanye na Andy Griffin bakinira Stoke City mu 2008 ubwo bahuraga na West Ham.
Gutsinda uyu mukino byatumye Everton igira amanota 18 ku mwanya wa 11, ikurikiye Manchester United zinganya amanota.
Ni ku nshuro ya mbere David Moyes watoje Manchester United ayitsindiye kuri Old Trafford muri Premier League, nyuma yo kuhakinira inshuro 18 kuva ahavuye.
