Ikimenyetso cy’Ubumwe: Abaramyi b’Icyubahiro Bitabiriye Ubutumire Bwa Mugenzi Wabo Mbere y’Igitaramo
3 mins read

Ikimenyetso cy’Ubumwe: Abaramyi b’Icyubahiro Bitabiriye Ubutumire Bwa Mugenzi Wabo Mbere y’Igitaramo

Mu mugoroba w’ibiganiro, ubuhamya n’urukundo rw’abakorera Imana, ubusabane bw’abaramyi b’ibikomerezwa bwabereye Mövenpick Hotel bwahurije hamwe amazina akomeye muri Gospel, mu rwego rwo gushima Imana no gushyigikirana mbere y’igitaramo “Niwe Healing Live Concert”.

Tariki ya 22 Ugushyingo 2025, Richard Nick Ngendahayo utegerejwe muri BK Arena yakiriye ku meza bagenzi be bafatanyije guharurira abandi baramyi inzira bazanyuzamo ubutumwa bwiza.

Muri baramyi bitabiriye ubu butumire barimo kizigenza Israel Mbonyi benshi basigaye bita “Iki manuka”, Tonzi, Bosebabireba, Prosper Nkomezi, Tracy Agasaro uzayobora “Niwe Healing Live Concert”, Gaby Kamanzi, Fanny Wibanara, Aime Uwimana, Jado Sinza & Esther n’abandi.

Byari ibyishimo bisendereye umutima kuri aba baramyi bitabiriye ibirori byaranzwe no gusangira, guhana ubuhamya bw’urugendo ndetse no guhoberana.

Muri ibi birori by’amateka byabereye Mövenpick Hotel, uyu muramyi wari ugaragiwe n’umugore we byagaragaje isura yuko iki gitaramo gishobora kuzandika amateka yo kwitabirwa n’ibyamamare.

Muri ibi birori, Richard Nick Ngendahayo umaze imyaka irenga 25 mu murimo w’Imana, yavuze ko iki gikorwa cyari gifite intego yo gushima Imana, gushimira abaramyi bagenzi be no kubaha ikaze nk’abantu bahuriye mu iterambere ry’umuziki wa Gospel mu Rwanda.

Mu butumwa yanyujije ku mbuga nkoranyambaga ze zirimo Instagram na Facebook, ku Cyumweru tariki 23 Ugushyingo 2025, yagize ati: “Mu ijoro ryashize, njye, umugore wanjye n’itsinda ryanjye twagiranye umusangiro mwiza hamwe n’abaramyi ndetse n’abahanzi b’indirimbo zihimbaza Imana bagenzi banjye muri Movenpick Kigali. Ndashimira ubumwe, ubusabane n’urugendo ruturi imbere.”

Gusangira bisobanuye gusabana no gusangiza abandi Umusaruro cyangwa umugisha wahawe n’Imana, kikaba igikorwa gikorwa n’imfura zateye umugongo umuzimu w’ubusambo.

Gutumira abaramyi twakwita abanyamiganane b’imena mu muziki wo kuramya no guhimbaza Imana bisobanuye kutikunda k’uyu muramyi Richard Nick Ngendahayo ufatwa nk’icyitegerezo cyo kwicisha bugufi. Benshi muri aba yababanjirije mu murimo utoroshye wo kwamamaza izina rya Yesu.

Kuba yazirikanye ko bagize uruhare rukomeye mu kwamamaza ubutumwa bwiza bimugaragaza nk’umuntu uha agaciro ibyakozwe na bagenzi be nk’uko yanabutangaje mu kiganiro cya Mbere yakoranye n’itangazamakuru akigera i Kigali ubwo yashimaga bagenzi be bahagaze mu cyuho nyuma y’uko yerekeje muri Amerika.

Babaye abararikwa beza. Ibi bisobanuye Iki?

Muri Luka 14:1-35 hagaragaramo abararikwa babi batekesherejwe ibyo kurya byinshi ariko banga kwitabira ubutumire bibabaza cyane uwabararitse.

Si ko byagenze kuri aba baramyi. Batitaye ku bibaca intege, batitaye kuri gahunda nyinshi bafite, aba baramyi bitabiriye ubutumire bwa mukuru wabo mu butumwa bwiza.

Ibi bikaba bigaragaza ishusho nziza, ubwumvikane,gushyigikirana ndetse n’ubwubahane mu muziki wo kuramya no guhimbaza Imana. Ibi bikaba byarahoze ari inzozi za buri mukunzi w’umuziki wo kuramya no guhimbaza Imana.

Igitaramo “Niwe Healing Lve Concert” cya Richard Nick Ngendahayo, kizaba tariki ya 29 Ugushyingo 2025 muri BK Arena. Ni igitaramo cy’amateka gitegerejwe nk’imbonekarimwe mu Rwanda rwa Gasabo.

Leave a Reply

Your email address will not be published. Required fields are marked *