Abakirisitu Baturutse mu Gihugu Hose Bahuriye ku Meza ya Kilometero Imwe i Washington mu Gikorwa “Communion America”
2 mins read

Abakirisitu Baturutse mu Gihugu Hose Bahuriye ku Meza ya Kilometero Imwe i Washington mu Gikorwa “Communion America”

Ikinyamakuru Christian World News cyatangaje inkuru ikomeje kuvugisha benshi ku isi, yerekeye igikorwa cy’amasengesho n’ubumwe cyiswe Communion America, cyabereye ku rwego rw’igihugu muri Leta Zunze Ubumwe za Amerika taliki ya 28 ugushyingo 2025.

Iki gikorwa cyasize amateka mu buryo bw’umwihariko bitewe n’ameza y’Ukarisitiya yari ifite uburebure bwa kilometero imwe, yashyizwe hagati ya Capitol na Washington Monument, ahazwi nka National Mall. Ni umwanya ubusanzwe ukoreshwa mu birori bikomeye by’igihugu, ariko uyu munsi wahariwe gusenga no gushima Imana mu buryo budasanzwe.

Imeza ingana na kilometero imwe yasangiriweho muri communion America

Abitabiriye iki gikorwa baturutse mu ntara zose 50 za Amerika, dore ko habarirwaga abasaga ibihumbi n’ibihumbi, bahuriye hamwe nk’umubiri umwe muri Kristo, bashyira imbere ubumwe bw’amadini atandukanye n’imico inyuranye.

Abateguye Communion America babwiye itangazamakuru ko iki gikorwa cyari gifite intego yo gusaba Imana gukiza igihugu, no kongera kwibutsa Abanyamerika ko ubumwe bushingiye kuri Kristo burusha imbaraga ibindi byose. Basobanuye ko gukoresha imeza imwe ndende ari ishusho yerekana ko, nubwo abantu batandukanye mu madini, politiki n’imico, bashobora guhura ku meza imwe y’Ukarisitiya, ameza y’urukundo n’amahoro.

Christian World News yagaragaje amashusho y’abana, urubyiruko, abantu bakuru ndetse n’abanyapolitiki bicaranye kuri iyo meza, basangira vino n’umutsima w’Ukarisitiya, mu mwuka w’amasengesho n’ubusabane. Abitabiriye bahamije ko iki gikorwa cyabateye imbaraga, kandi cyabashishikarije gusubira ku ishingiro ry’ukwemera kwabo.

Abashumba bakomeye n’abanyamadini batandukanye bagarutse ku kamaro k’iki gikorwa, bavuga ko ari “ubutumwa bukomeye bw’ubumwe”, mu gihe Amerika ihanganye n’ingaruka z’amakimbirane ya politiki, ihindagurika ry’imico ndetse n’uruhurirane rw’impaka mu buzima bw’igihugu.

Nubwo ari igikorwa cyabereye muri Amerika, ubutumwa bwacyo bwakwirakwiye ku isi yose, aho abakristu mu bihugu bitandukanye bagize icyo bavuga. Benshi babubonye nk’icyitegererezo cy’uko amatorero yo ku isi ashobora gukoresha ubumwe n’ubusabane mu gusana ibyangiritse muri sosiyete.

Communion America yarenze kuba igikorwa cy’amateka; yabaye ikimenyetso cy’uko mu gihe ibihe biba bikomeye, abantu bashobora kongera kwiyunga, gusenga hamwe no gushyira imbere umusaraba wa Kristo nk’isoko y’amahoro n’ubumwe.

Mbere yo guhurira kumeza y’Ukaristiya abantu bose bari mumatsinda basenga

abitabiriye bari ingeri zose,abana,urubyiriko nabakuze

umuteguro wisangira ry’ukaristiya mumagambo asobanura Umwami w’abami

Leave a Reply

Your email address will not be published. Required fields are marked *