Yakabaye Yinjiza Afaranga Menshi_ Apulikasiyo Ya Bibiliya kuki Ikomeje Kuba Ubuntu?
Nubwo ikoranabuhanga ry’isi rishingira ku nyungu z’ubucuruzi, YouVersion yo yahisemo inzira idasanzwe, ihitamo inzira yo kugeza ijambo ry’Imana ku bantu bose ku buntu, idashaka inyungu z’amafaranga. Ni mu gihe yakabaye yinjiza amamiliyari menshi.
Mu gihe isi y’ikoranabuhanga ikomeje kwihuta ndetse ibigo byinshi bikarushanwa mu gushaka inyungu z’ubucuruzi, hari urubuga rumwe rwahisemo kutajya muri iyo nzira. Ni YouVersion, rwashinzwe na Bobby Gruenewald, rufite izina rikomeye kubera Bible App, imwe mu porogaramu z’Isi zikoreshwa cyane mu gusoma Bibiliya mu buryo bwihuse kandi bworoshye.
Kuri ubu Apulikasiyo ya Bibiliya igendanwa na benshi mu bikoresho byabo by’Ikoranabuhanga, yaba mu materefone, za mudasobwa ndatse n’ibindi bikoresho, bityo bikorohera benshi kugera ku ijambo ry’Imana no kurisoma igihe babishakiye aho bari hose byoroshye.
Gruenewald, mu kiganiro aherutse kugirana n’urubuga saltandlight.sg, yasobanuye ko intego ya YouVersion kuva ku munsi wa mbere atari amafaranga cyangwa ubucuruzi, ahubwo ari “ugushyira Bibiliya mu maboko n’imitima y’abantu ku isi hose.” Ni yo mpamvu Bible App yagumye kuba ubuntu kuva yatangizwa kugeza ubu.
Kuva yashingwa mu 2008, YouVersion yakomeje kwifuzwa na benshi batangaga amamiliyoni ngo bayibyaze inyungu zishingiye ku mafaranga, ariko YouVersion ntibyari muri gahunda zayo. Kuri ubu iri hafi kugera ku bantu miliyari bayikoresha. Yahinduye uburyo abantu bagera ku Ijambo ry’Imana, ibasha kurenga imipaka y’imico, indimi n’amadini, iba imwe mu porogaramu zikunzwe cyane ku isi.
Abasesenguzi b’ikoranabuhanga bavuga ko iyo YouVersion iza kuba ikigo cy’ubucuruzi, cyari kuba gifite agaciro ka miliyari nyinshi z’amadolari, kikitwa “unicorn” inshuro nyinshi nk’abandi bagaciro bakomeye mu ikoranabuhanga. Ariko Guenewald avuga ko ayo mafaranga atari yo shingiro ry’umushinga.
Ati: “Kuki App mutayisoresha amafaranga?” ni ikibazo abazwa kenshi. Akunda gusubiza ati: “Ntituri kongera inyungu z’amafaranga, turi kongera ingufu z’Ubwami bw’Imana.”
Abantu benshi bavuga ko Bible App yabahaye uburyo bwo gusoma Bibiliya buri munsi, ikabafasha gukura mu buryo bw’umwuka, kandi kuba ari ubuntu bikaba byerekana ko agakiza n’ijambo ry’Imana bitagurishwa.
YouVersion, nk’umushinga udaharanira inyungu, yahisemo kuba urumuri mu isi y’ikoranabuhanga isanzwe irimo guhatanira inyungu. Igaragaza ko ikoranabuhanga riramutse rikoze neza, ryaba inzira yo kugeza ku kuri no gufasha abantu, aho kuba umuyoboro wo kunguka.
Mu by’ukuri, YouVersion yiyemeje kujya aho abantu bari, kubaha Bibiliya ku buntu, no kuyigeza ku bantu bose n’ahantu hose, buri munsi. Aho ni ho ishingiro ry’intsinzi yayo riri, bukanaba n’ubutumwa bukomeza kuyitandukanya n’ibindi bigo: gukorera Imana no gufasha abantu kubaho ubuzima bwuzuye binyuze mu ijambo ry’Imana.
