“Yampinduye Mushya”, Jado Sinza & Esther bashyize hanze indirimbo ikangura imitima ku mpinduka zibonerwa muri Yesu
Abahanzi b’indirimbo zo kuramya no guhimbaza Imana, Jado & Esther, bashyize hanze indirimbo nshya “Yampinduye Mushya.” Ni ubutumwa bukomeye bw’ivugabutumwa, busobanura ihinduka ryimbitse ry’umuntu wahuye na Yesu akava mu buzima bwa kera akinjira mu buzima bushya bwuzuye imbabazi n’ukwizera.
Abahanzi ba gospel Jado Sinza & Esther bashyize ahagaragara indirimbo nshya bise “Yampinduye Mushya”, ikomeje kwakirwa neza n’abakunzi b’indirimbo zo kuramya no guhimbaza Imana, dore ko mu munsi umwe imaze isohotse imaze kurebwa n’abarenga ibihumbi 20. Iyi ndirimbo ishingiye ku buhamya bw’umuntu wahuye na Yesu Kristo, akababarirwa ibyaha bye, agahinduka undi muntu mushya mu mutima, mu bitekerezo no mu mibereho ye ya buri munsi.
Mu magambo yayo, iyi ndirimbo ishimangira ko nubwo umuntu yaba yarabaye mubi, akora ibibi kandi akarangwa n’ubugome, imbabazi za Yesu zimugeraho zikamugira mushya.
“Nubwo yari mubi, yagiriwe imbabazi ahabwa ubuzima bushya”, amwe mu magambo y’indirimbo, agaragaza ko nta muntu n’umwe uri kure y’urukundo rw’Imana iyo yemeye guhinduka.
Ubutumwa bw’iyi ndirimbo bugaruka ku nsanganyamatsiko yo kongera kuvuka mu mwuka, nk’uko Bibiliya ibivuga ko uwari muri Kristo aba ari icyaremwe gishya.

Abahanzi Jado Sinza & Esther bamaze gushyira hanze indirimbo nshya Yampinduye mushya
Aba bahanzi bifashishije urugero rusa n’urwa Pawulo intumwa, aho indirimbo ivuga ku muntu wari umugome, urenganya ubwoko bw’Imana, ariko akaza guhura n’umucyo umwambura ibyahise bye byose.
Umurongo ugira uti: “Nahuye n’umucyo unziba amaso nibagirwa ibyacyera” usobanura ihinduka rikomeye rikorwa no guhura na Yesu, aho iby’isi byari indamu bihindurwamo kwizera n’ubugingo bushya.
“Yampinduye Mushya” kandi ishimangira urukundo n’imbabazi by’Imana, aho umuhanzi aririmba ati: “Ni we wambabariye ibyo nakiraniwe byose acungura ubugingo bwanjye”, agaragaza ko agakiza atari ingororano z’imirimo myiza, ahubwo ari impano itangwa ku buntu ku wemera Yesu. Iyi ndirimbo ihamagarira abayumva kwiyegurira Imana, bakareka ibyahise byabo, bakambara ubugingo bushya.
Mu majwi meza n’amashusho, iyi ndirimbo igaragaza ubwumvikane n’ubusabane bwiza hagati ya Jado Sinza & Esther, bigatuma ubutumwa bwayo bugera ku mitima y’abayumva mu buryo bworoshye kandi bwimbitse.
Ni indirimbo ikwiye kumvwa n’abifuza kongera kwizera, kwicuza no gutangira urugendo rushya na Kristo.
“Yampinduye Mushya” yiyongereye ku ndirimbo za gospel zikomeje gukoresha ubuhamya nk’intwaro ikomeye yo kugeza ivugabutumwa ku bantu, by’umwihariko mu bihe isi ikeneye ibyiringiro, imbabazi n’impinduka zituruka ku Mana.
Indirimbo ifite ubutumwa bumwe bukomeye: uwo Yesu ahuye na we, ntiyigumamo uko yari ari, ahubwo ahinduka mushya.
Jean de Dieu Sinzabyibagirwa, uzwi cyane ku izina rya Jado Sinza & Esther Umulisa, ni rimwe mu matsinda y’abahanzi aririmbana nk’umugabo n’umugore. Aba bombi basezeranye ku mugaragaro ku wa Kane, tariki ya 5 Nzeri 2024, mu muhango wabereye mu Murenge wa Kimironko mu Mujyi wa Kigali.

Ni rimwe mu matsinda yo mu Rwanda akora umuziki wo guhimbaza Imana babana nk’umugabo n’umugore
