Indirimbo nshya “Ingoro y’Uhoraho” isaba abakristu guha agaciro ahakorerwa isengesho
Ibinyujije mu ndirimbo, mu majwi meza n’amashusho, Korale Ijwi rya Muhima yahamagariye abantu guha agaciro Ingoro y’imana, maze isohora indirimbo nshya ishingiye ku byanditswe byera.
Mu rwego rwo kwizihiza umunsi mukuru wa Noheri binyuze mu ivugabutumwa rishingiye ku ndirimbo, Korale Ijwi ry’Ihumure Muhima yasohoye indirimbo nshya yitwa “Ingoro y’Uhoraho”, indirimbo igaruka ku gaciro k’urusengero n’akamaro ko gusenga Imana mu mwuka no mu kuri, nk’uko bigaragara mu Byanditswe byera.
Iyi ndirimbo yasohowe na korale ikorera mu Itorero ry’Abadivantiste b’Umunsi wa Karindwi ku Muhima, ikaba iri mu ndirimbo zo kuramya no guhimbaza Imana zifite ubutumwa bwimbitse bwo kwibutsa abakristu ko aho bateraniye mu izina ry’Imana, hahinduka ingoro yayo.
Mu majwi yayo meza ajyanye n’injyana ya classic ndetse n’amashusho ateguye neza, iyi ndirimbo ihamagarira abantu guha agaciro Ingoro y’Imana no kuyiyegereza mu cyubahiro n’ituze.
“Ingoro y’Uhoraho” ishingiye ku butumwa bwo mu Ijambo ry’Imana dusanga muri Yohana 4:23, havuga ku basenga Imana mu mwuka no mu kuri, no muri Habakuki 2:20 hagaragaza ko Uwiteka ari mu rusengero rwe rwera kandi ko isi yose ikwiye guturiza imbere ye. Aya magambo atanga ishingiro ry’ubutumwa korale yashyize imbere muri iyi ndirimbo.
Mu kiganiro yagiranye na Gospel Today, umuvugizi wa Korale Ijwi ry’Ihumure Muhima, bwana Sibomana Josue, yavuze ko iyi ndirimbo bayihimbye bagamije gukangurira abakristu guha ingoro y’Imana icyubahiro gikwiye no guha agaciro iteraniro igihe baba bagiye gusenga.
Yagize ati, “Ni indirimbo ifite ubutumwa bukomeye ku rusengero aharamirizwa Imana. Isobanura ko igihe tugeze mu rusengero tugomba gutuza tukumva ijambo ry’Imana. Uwiteka ari mu rusengero, tugomba kuruhesha agaciro.”
Yakomeje agaragaza ko hari aho bamwe mu bantu batesheje agaciro urusengero, bakarugaragaramo imyitwarire itajyanye n’aho basengera, birimo kuganira, gukubagana cyangwa kujya mu bikorwa bitandukanye bidahuje n’isengesho.
Yibukije ko urusengero rukwiye kujyamo abantu bashaka Imana by’ukuri, atari kujyayo ku zindi mpamvu, bityo bakayitahana aho gutaha ubusa.
Ati: “Abantu benshi batesheje agaciro urusengero bifata uko bashatse bageze mu rusengero, bagakubagana, bakajya muri chart; ibi byose ntibikwiye. Abantu bakwiye kujya mu rusengero bashaka Imana aho kujyayo ku zindi mpamvu zitandukanye nk’uko dusoza tubabwira duti; ‘tuyitahane aho gutaha ubusa.’”
Yasoje avuga ko bazakomeza gutanga ubutumwa Imana izaba ibatumye mu izina rya Yesu Kristo, anashimira abakunzi babo ku bitekerezo n’inkunga bakomeza kubaha.
Korale Ijwi ry’Ihumure Muhima imaze imyaka myinshi ikora ivugabutumwa binyuze mu ndirimbo, dore ko yatangiye mu mwaka wa 1997 igizwe n’urubyiruko rwaririmbaga muri J.A, ubu ikaba ikorera ivugabutumwa mu mijyi no mu cyaro. Kugeza ubu, iyi korale ifite imizingo itanu y’amajwi ndetse n’indi itatu y’amashusho. Ikomeje gutanga umusanzu ugaragara mu muziki wo kuramya no guhimbaza Imana mu Rwanda.
