Ngarambe François Xavier na Solange bizihije Saint Valentin bavugurura isezerano ry’imyaka 32 babana nk’umugabo n’umugore
3 mins read

Ngarambe François Xavier na Solange bizihije Saint Valentin bavugurura isezerano ry’imyaka 32 babana nk’umugabo n’umugore

Mu gihe hizihizwaga Umunsi Mpuzamahanga w’Abakundana uzwi nka Saint Valentin ku wa 14 Gashyantare 2026, Umuhanzi w’indirimbo za Krahanyuze Ngarambe François Xavier n’umugore we Solange Ngarambe bavuguruye isezerano ryabo ry’ugushyingiranwa bamaze imyaka 32 bubatse urugo.

Babinyujije ku rubuga rwa Instagram, babwiranya amagambo y’urukundo yabaye isoko y’ibyishimo n’amasomo ku bakunzi babo, bwibutsa benshi ko urukundo nyarwo ari urwiyubaka buri munsi.

Ku mugoroba wo ku wa 14 Gashyantare2026, Ngarambe yasangije abamukurikira ifoto igaragaza ko bombi bavuguruye amasezerano y’isakaramentu ryo gushyingirwa. Mu magambo yuje amarangamutima yaherekeje iyo foto yasubiye mu magambo ya Mutagatifu Tereza w’Umwana Yezu, ashimangiye ko urukundo ari ukwiyegurira undi mu kuri no mu budahemuka.

Ati: “Gukunda ni ugutanga byose no kwitanga wowe ubwawe.  Uyu munsi, mu ruhame rwa benshi, twavuguruye amasezerano yacu y’ugushyingirwa yo gukundana no kubahana kugeza gupfa.”

Muri ubwo butumwa bwuzuye amarangamutima kandi yagaragaje ko urukundo rwabo rushishiye ku Mana ari na yo musingi w’urugo rwabo kuva batangira urugendo rwo kubana.

Yagize ati: “Guha undi byose, kwiha undi, wenyine, wese, iteka. Uwaduhamagaye ni Indahemuka azakomeza kubidushoboza. Twunge ubumwe na We, buri wese ku giti cye, kandi twembi. Ndagukunda. Umuvugo wawe w’urukundo”

Ngarambe Solange na we ntiyihereranye ibyo byishimo kuko yahise asubiza umugabo we mu magambo yuje urukundo, agaragaza ko kuvugurura Yego yabo byari igitangaza gikomeye. Yavuze ko akomeje urugendo rw’urukundo rugana ku rukundo kandi rubanwa n’urukundo, amagambo yerekana ko mu myaka 32 ishize bakomeje kubaka no gusigasira isezerano bagiranye.

Yagize ati: “Muvugo wanjye w’urukundo, mbega igitangaza, Yego yacu yavuguruwe kandi yahawe umugisha uyu munsi!”

Urugendo rwabo rwatangiye mu 1991 bakundana bakiri bato, basezerana imbere y’amategeko ku wa 10 Nzeri 1993, nyuma baza guhabwa isakaramentu ryo gushyingirwa ku wa 1 Mutarama 1994. Uyu munsi bamaze imyaka 32 babana nk’umugabo n’umugore, bakaba barabyaye abana batanu, barimo na Rwego Ngarambe usanzwe ari Umunyamabanga wa Leta muri Minisiteri ya Siporo.

Urugo nk’umusingi w’igihugu

Ngarambe François Xavier akunze kugaragaza ko urugo atari umubano w’abantu babiri gusa, ahubwo ari umusingi w’igihugu.

Muri 2025 tariki ya 10 Nzeri, ubwo bizihizaga isabukuru y’imyaka 32 bamaze mu rushako, yavuze ko bumvise inshingano yo kubera u Rwanda umutako mwiza urubereye, urugo rwabo rukaba mu ngo zibereye igihugu umusingi ukomeye. Ibi babishyira mu bikorwa babinyujije mu buhamya bwabo no mu nyigisho baha imiryango itandukanye.

Muri 2023 ubwo bari mu mugoroba wiswe “Kigali Family Night”, bavuze ko batabaho badashwanye kuko ntazibana zidakomanya amahembe. Icyakora bemeje ko batazi ingano y’inshuro basabanye imbazi maze urukundo rwabo rukarushaho gukura, ku buryo ngo hari aho bigeze kugera bakavuga ngo ‘ntako bias gushwana.’

Icyo gihe Yvonne Ngarambe ati: “Umuryango mwiza urashoboka, ariko umuryango nta makemwa ntushoboka, ntibazababeshye. Ntabwo dushobora kuba intungane, Imana yonyine ni yo itunganye. Kubera ko turi abantu, duhora ducumura.”

Bombi bahamya ko nta muryango utagira ibibazo, ariko ko igikomeye ari ukwibuka isezerano no gusabana imbabazi igihe habayeho kudahuza.

Ubutumwa bwabo kuri Saint Valentin bwabaye isomo rikomeye ku bashakanye n’abateganya gushinga ingo, bubibutsa ko gukunda ari ugutanga byose no kwitanga wowe ubwawe, kandi ko isezerano risigasirwa n’umuriro w’urukundo uhora ugurumana.

Ngarambe François Xavier na Ngarambe Solange bizihije Saint Valentin bavugurura isezerano ry’imyaka 32 babana nk’umugabo n’umugore

Leave a Reply

Your email address will not be published. Required fields are marked *