Ni Wowe Nkeneye_Indirimbo ihamagarira abizera kwiringira Yesu Kristu
1 min read

Ni Wowe Nkeneye_Indirimbo ihamagarira abizera kwiringira Yesu Kristu

Mu gihe umuziki wo kuramya mu Rwanda ukomeje gutera imbere, umuhanzi Alexis Nkomezi yashyize hanze indirimbo nshya yise “Ni Wowe Nkeneye”, igaruka ku buzima bw’umukristo wiringira ko Yesu ari we wenyine ushobora guhaza inyota n’ibyifuzo by’umutima.

Ni indirimbo yasohotse ku wa 14 Werurwe 2026 ikaba ikomeje kwigarurira abakunzi b’umuziki wo kuramya no guhimbaza Imana. Ni wowe Nkeneye ibumbatiye ubutumwa bugaragaza ko Yesu Kristo ari we soko y’ibyiringiro by’ukuri ku muntu umwiringira.

Iyi ndirimbo igaruka ku rukundo n’imbabazi z’Imana, aho igaragaza ko umuntu wese ugarukira Yesu ashobora kubona amahoro n’icyerekezo cy’ubuzima. Aterura agira ati: “Yesu Kristo mucunguzi mwiza, ni wowe nzara n’inyota mfite, nyobora ku masoko y’ukuri, mpa urukundo umpaze imbabazi,” amagambo agaragaza ukwizera gukomeye ku Mana.

Nkomezi ashimangira ko umukristo ukwiriye kwizera Yesu atagomba guterwa isoni n’ukwemera kwe, maze akagira ati: “Ni wowe nkeneye sinzigera nkorwa n’isoni, ni wowe nkeneye umutima uzaturiza iwawe,” amagambo ashimangira ko amahoro y’ukuri aboneka gusa mu kuguma mu rukundo rw’Imana.

Alexis Nkomezi ni umwe mu bahanzi bamenyekanye cyane mu muziki wa Gospel mu Rwanda, aho yamenyekanye cyane binyuze mu ndirimbo zo kuramya no guhimbaza Imana. Yagiye akora indirimbo zakunzwe n’abakunzi b’uyu muziki zirimo “Mbaraga za Yesu”, “Turacyakwizeye”, “Fata Ukuboko” na “Goligota”, zagiye zifasha benshi mu gusenga no gukomeza urugendo rw’ukwemera.

Uyu muhanzi azwi kandi mu gutegura ibitaramo byo kuramya Imana no gufatanya n’abandi bahanzi ba Gospel mu bikorwa bitandukanye bigamije gukomeza gukwirakwiza ubutumwa bwiza. Indirimbo ye nshya “Ni Wowe Nkeneye” ikaba yiyongereye ku zindi yagiye akora zigamije gufasha abantu gukomeza kwizera no kwegera Imana.

Kanda hano urebe indirimbo nshya Ni Wowe Nkeneye

Leave a Reply

Your email address will not be published. Required fields are marked *