Amadiyosezi agize Kiliziya Gatolika mu Rwanda ashobora kuva ku icyenda akagera kuri cumi n’imwe
Abakristu bo mu bice byahoze ari Kibuye n’Umutara bavuga ko diyosezi nshya zabegereza ubuyobozi bwa Kiliziya, zikanafasha iyogezabutumwa n’iterambere ry’abakristu. Ni mu gihe hari ikifuzo cy’uko hakongerwa amadiyosezi akava kuri 9 akagera kuri 11.
Mu gihe abakristu Gatolika mu Rwanda bakomeje kwitabira ibikorwa by’iyogezabutumwa, abo mu bice byahoze ari Kibuye n’Umutara bakomeje kugaragaza icyifuzo cy’uko hashyirwaho amadiyosezi mashya abegereye, arimo Diyosezi ya Kibuye n’iy’Umutara. Bemeza ko iki cyifuzo kigamije koroshya imiyoborere ya Kiliziya no gutuma abakristu begerezwa serivisi z’iyogezabutumwa n’ubuyobozi bw’idini.
Mu Rwanda, Kiliziya Gatolika ifite arikidiyosezi imwe ya Kigali hamwe n’andi madiyosezi atandukanye arimo Butare, Cyangugu, Gikongoro, Kabgayi, Kibungo, Nyundo, Ruhengeri na Byumba. Aya madiyosezi yose abarizwa mu Ntara ya Kiliziya ya Kigali, ari na yo iyoboye ibikorwa bya Kiliziya Gatolika mu gihugu.
Bamwe mu bakristu bavuga ko gushinga diyosezi nshya byatuma ubuyobozi bwa Kiliziya bubegera, bikoroshya gukurikirana ubuzima bw’amaparuwasi no kunoza iyogezabutumwa. Bemeza ko kuba Umwepiskopi n’izindi nzego z’ubuyobozi bwa diyosezi byabegera byafasha abakristu gukura mu kwemera no kwitabira ibikorwa bya Kiliziya ku buryo bufatika.
Banagaragaza ko diyosezi nshya zishobora kugira uruhare mu iterambere ry’abaturage binyuze mu mishinga ya Kiliziya ijyanye n’uburezi, ubuvuzi n’ibikorwa by’urukundo. Hari n’abavuga ko izi nzego zishobora gufasha mu gukomeza kubaka ubumwe n’ubwiyunge mu muryango nyarwanda.
Ubwo hatangizwaga Inteko Rusange ya 177 y’Abepiskopi Gatolika mu Rwanda yabaye kuva ku wa 3 kugeza ku wa 6 Werurwe 2026, abanyamakuru babajije Padiri Vedaste Kayisabe, Umunyamabanga Mukuru w’Inama y’Abepiskopi Gatolika mu Rwanda, ku bijyanye n’iki cyifuzo. Yasobanuye ko gushyiraho diyosezi ari inzira inyura mu byiciro bitandukanye mbere yo gufatwaho icyemezo cya nyuma.
Padiri Kayisabe yavuze ko ubusabe butangira busabwa, bugasuzumwa harebwa niba ibisabwa byose byujujwe, hanyuma bikaba byashyirwa mu bikorwa.
Yagize ati “Abakristu twababwira ko ibijyanye no gushyiraho amadiyosezi bigira inzira binyuramo. Bitangira bisabwa, hanyuma bigakirwa, hagakurikiraho gusuzuma niba byashoboka, harebwa niba ibisabwa byose bihari, hanyuma bikabona gushyirwa mu bikorwa.”
Yongeyeho ko kuba hari amadiyosezi manini cyane afite abakristu benshi ari imwe mu mpamvu zituma bamwe mu bakristu bagaragaza icyifuzo cyo kubona diyosezi zibegereye.
Ku rundi ruhande, ubuyobozi bwa Kiliziya bwagaragaje ko nubwo iki cyifuzo gihari, kitaragera ku rwego rwo kuvuga ko kiri hafi gushyirwa mu bikorwa. Kugeza ubu kiracyari mu rwego rw’ibyifuzo, ariko abakristu benshi bakomeje kwizera ko igihe kizagera ibisabwa byose byuzuye, Kiliziya ku rwego rw’isi ikazafata icyemezo ku ishyirwaho rya Diyosezi ya Kibuye n’iy’Umutara.
