Vedaste Christian na Pastor Mugabowindekwe mu bazitabira igitaramo gikomeye cyateguwe na The light worship team
Igitaramo gikomeye cyo kuramya no guhimbaza Imana cyateguwe n’Umuryango w’Abanyeshuri b’Abapantekote (CEP) kigiye kongera kubera i Kigali, kikaba cyiswe “True Worship Live Concert Season 4.”
Iki gitaramo gitegerejwe na benshi kizaba ari umwanya udasanzwe wo kwegerana n’Imana binyuze mu ndirimbo no mu ijambo ryayo.Iki gitaramo kizaba gifite insanganyamatsiko igira iti: “Kuramya mu kuri,” ishingiye ku ijambo riboneka muri Yohana 4:23-24, rishishikariza abakristo kuramya Imana mu mwuka no mu kuri.
Abateguye iki gikorwa batangaje ko ari umwanya mwiza wo kongera kwiyegereza Imana no gusubizamo imbaraga mu rugendo rw’agakiza.Biteganyijwe ko iki gitaramo kizaba ku matariki ya 25 na 26 Mata 2026, kikazabera ku rusengero rwa ADEPR Nyarugenge, guhera saa munani z’amanywa kugeza saa kumi n’ebyiri z’umugoroba.
Amahirwe mashya yo kwegera Imana: True Worship Live Concert iragarutse” ibihe byo kuramya byateguwe na The light worship team

Ni gitaramo kizamara iminsi ibiri, kigahuza abantu batandukanye baturutse hirya no hino mu gihugu.Mu bazitabira iki gitaramo harimo umuvugabutumwa Pastor Joseph Mugabowindekwe, uzatanga ijambo ry’Imana, ndetse n’umuramyi Vedaste Christian uzafasha abantu kwinjira mu bihe byimbitse byo kuramya. Aba bose bazifatanya n’andi matsinda azwi cyane mu muziki wo kuramya no guhimbaza
“I Kigali hategerejwe igitaramo gikomeye cya True Worship Season 4”
Amatsinda azaririmba muri iki gitaramo arimo The Light Worship Team yo muri CEP ULK, Hohma Worship Team yo muri CEP INES Ruhengeri, Eli Elohe Worship Team yo muri CEP-UR Gikondo, ndetse na Elim Praise & Worship Team yo muri CEP-UR Nyarugenge. Aya matsinda yose azwiho ubuhanga n’imbaraga mu muziki wa gospel.
Abateguye iki gikorwa barahamagarira buri wese wifuza kwifatanya nabo kuzitabira ari benshi, bakazabona umwanya wo kuramya Imana mu buryo budasanzwe no kongera kubaka ukwizera kwabo. Ku bifuza ibindi bisobanuro, bashobora guhamagara kuri nimero yatanzwe n’abateguye iki gitaramo.