Aline Gahongayire agiye gutanga undi musanzu mu muziki wo kuramya Imana binyuze mu gushyigikira impano nshya
2 mins read

Aline Gahongayire agiye gutanga undi musanzu mu muziki wo kuramya Imana binyuze mu gushyigikira impano nshya

Binyuze mu butumwa bwe akomeje, Aline Gahongayire yasabye abanyempano kuririmba indirimbo ye nshya Yesu Ashimwe yitiriye Album ye, aho uzitwara neza azafashwa gukorerwa indirimbo, amashusho no kumenyekanishwa ku rwego rwisumbuyeho.

Umuhanzi w’indirimbo zo kuramya no guhimbaza Imana, Aline Gahongayire, yatangaje amarushanwa mashya agamije kuzamura impano nshya mu muziki wa gospel, aho uzahiga abandi azahabwa amahirwe yo gukorerwa indirimbo yuzuye no gufashwa kumenyekana.

Ibi yabigarutseho mu ijoro ryo ku wa Kabiri tariki ya 28 Mata 2026, abinyujije ku rukuta rwe rwa Instagram, agaragaza ko ari imwe mu ntambwe nshya ateye mu gukomeza gushyigikira abakiri kuzamuka mu muziki uhimbaza Imana.

Aline Gahongayire yavuze ko iki gitekerezo cyaturutse ku bikorwa bitandukanye amaze iminsi akora birimo ibiganiro nka Mvura nkuvure, Bblessed Show, Talk with Dr Alga na Purple Connect, byose byibanda ku kubaka ubuzima bw’umwuka n’iterambere ry’impano.

Yahereye ku album ye nshya yise Yesu Ashimwe, asaba abanyempano bose kuyiririmba mu buryo bwabo bwihariye, bagakora ‘challenge’ ishobora kubageza ku mahirwe akomeye yo gutsindira ibihembo byateganyijwe.

Mu butumwa bwe yagize ati: “Abanyempano rero kora ‘challenge’ y’indirimbo ‘Yesu Ashimwe’ ukoreshe ijwi ryawe,” agaragaza ko yifuza kubona ubuhanga butandukanye mu kuririmba iyo ndirimbo.

Uzahiga abandi azahabwa ibihembo birimo gukorerwa indirimbo mu buryo bw’amajwi (audio) n’amashusho (video), guhabwa ubufasha mu kumenyekanisha igihangano cye (promotion), ndetse n’igihembo cy’amafaranga nubwo umubare wacyo utatangajwe.

Aline Gahongayire yashimangiye ko intego nyamukuru ari uguha umugisha abantu benshi binyuze mu ndirimbo ze, ariko by’umwihariko agashyigikira impano nshya zikeneye urubuga rwo kwigaragaza.

Yakomeje asaba abakunzi be ku mbuga nkoranyambaga kuzamufasha mu gutoranya uzahiga abandi, avuga ko ubufatanye ari ingenzi mu kuvumbura impano zidasanzwe.

Abifuza kwitabira aya marushanwa basabwe kohereza amashusho yabo baririmba iyi ndirimbo banyuze ku rukuta rwe rwa Instagram cyangwa kuri nimero ya telefoni yatanzwe, bakongeraho amazina yabo.

Iri rushanwa rije mu gihe umuziki wa gospel mu Rwanda ukomeje kwaguka, rikaba ritegerejweho kuvumbura impano nshya zizagira uruhare mu iterambere ry’uyu muziki no gukomeza kugeza ubutumwa bwiza ku bantu benshi.

Leave a Reply

Your email address will not be published. Required fields are marked *