Kwibuka: Korali Umusamariya Mwiza Nyamirambo SDA yifatanyije n’abatuye Umurenge wa Nyamirambo mu Kwibuka Jenoside yakorewe Abatutsi
2 mins read

Kwibuka: Korali Umusamariya Mwiza Nyamirambo SDA yifatanyije n’abatuye Umurenge wa Nyamirambo mu Kwibuka Jenoside yakorewe Abatutsi

Bifashishije indirimbo Bahumurize itanga ubutumwa bwo gukomeza urugendo rwo kubaka ubumwe n’amahoro, Korali Umusamariya mwiza yahumurije inakomeza abarokotse Jenoside yakorewe abatutsi mu 1994, yasize yasize aberenga miliyoni bishwe bazira uko bavutse.

 Mu gikorwa cyo Kwibuka Jenoside yakorewe Abatutsi mu 1994 cyabereye mu Murenge wa Nyamirambo kuri uyu wa 24 Gicuransi 2026, Korali Umusamariya Mwiza yifatanyije n’abaturage muri iki gikorwa cyo kunamira no kuzirikana inzirakarengane zazize Jenoside, itanga ubutumwa bwo guhumuriza no gukomeza abarokotse Jenoside binyuze mu ndirimbo yabo bise “Bahumurize”.

Iki gikorwa cyabaye mu rwego rwo Kwibuka ku nshuro ya 32 Jenoside yakorewe Abatutsi, aho abaturage, abayobozi n’amadini bahuriye hamwe mu rwego rwo gukomeza kubungabunga amateka no guharanira ko Jenoside itazongera kubaho ukundi mu Rwanda. Ni igikorwa cyabanjirijwe n’umugoroba wo kwibuka imiryango yazimye cyabaye tariki ya 23 Gicurasi 2026.

Indirimbo Bahumurize, ibumbatiye ubutumwa bwo gukomeza kuba hafi abarokotse Jenoside, kubafasha kongera kugira icyizere cy’ubuzima no kubereka urukundo n’ubumuntu nyuma y’amateka y’icuraburindi banyuzemo.

Amagambo agize iyi ndirimbo yagarukaga ku ihumure n’icyizere, ashimangira ko nubwo ku isi duhura n’ibibazo bikomeye bidutera amarira, ariko hari igihe kizagera imibabaro ikarangira.

“Tugira umubabaro n’ishavu iyo twibuka abacu, tugira amarira n’imiborogo iyo twabuze abacu, ariko muhumure bizashira ntabwo tuzahora turira Yesu ari hafi kugaruka,” amagambo agize indirimbo.

Isaba abayumva gukomeza guhumurizanya kuko igihe Yesu azaba aje gutwara abamukoreye azabahanagura amarira bityo imibabaro yo mu isi ikazarangira.

Iyi ndirimbo imaze umwaka urenga isohotse kuko yasohotse tariki ya 09 Mata 2025, mu gihe u Rwanda n’isi muri rusanga bibuka Jenoside yakorewe abatutsi muri Mata 1994. Imaze kurebwa n’abasaga ibihumbi 134, ikaba igizwe n’iminota 6 n’amasegonda 45.

Iki gikorwa kandi cyabaye umwanya wo kongera kwibutsa abantu bose uruhare rwo kurwanya ingengabitekerezo ya Jenoside no gukomeza gusigasira ubumwe n’ubudaheranwa Abanyarwanda bagezeho nyuma ya Jenoside yakorewe Abatutsi mu 1994.

Korali Umusamariya Mwiza ni imwe mu makorali azwi cyane mu Rwanda mu ivugabutumwa rikoresheje indirimbo zihimbaza Imana, aho imaze imyaka myinshi ikora umurimo wo gukomeza abakirisitu no gutanga ubutumwa bw’ihumure, urukundo n’ibyiringiro binyuze mu muziki.

Iyi korali yagiye imenyekana cyane kubera ubuhanga bwayo mu miririmbire no gutegura ibitaramo by’ivugabutumwa bikora ku mitima y’abantu batandukanye.

Mu ndirimbo zayo zakunzwe harimo Bahumurize, Bimaze Iki, Urabeho, Turashima na Kuna Siri, zakomeje kugera ku bantu benshi binyuze ku miyoboro itandukanye no mu bitaramo bitandukanye by’ivugabutumwa.

Kanda hano wumve indirimbo BAHUMURIZA

Leave a Reply

Your email address will not be published. Required fields are marked *