Himbaza Family Choir yateguye igiterane cy’iminsi itatu itumira amakorali afite umwihariko mu kuramya Imana

Himbaza Family Choir na ADEPR KamuhOza Parish batangaje igitaramo gikomeye cyiswe Himbaza Gospel Fest, giteganyijwe kubera muri ADEPR Kamuhoza kuva ku itariki ya 21 kugeza ku ya 23 Kanama 2026. Ni igikorwa kigamije guhuriza hamwe abakristo, amakorali n’abaramyi mu bihe byamasengesho, kuramya no guhimbaza Imana.

Iki gitaramo kizaba gifite insanganyamatsiko iri muri “Zaburi 132:2”, ikaba itumira abitabiriye kwegera Imana no kuyihimbaza mu buryo bwihariye. Abateguye iki gikorwa bavuga ko ari umwanya wo gusangira ubutumwa bwiza binyuze mu ndirimbo, kuramya no kwigisha Ijambo ry’Imana.Mu bazatanga ubutumwa muri Himbaza Gospel Fest harimo Pasiteri Rudasingwa Claude, Pasiteri Mugabowindekwe Joseph na Pasiteri Cyubahiro Charles, bakaba bategerezanijwe amatsiko menshi n’ibyishimo mu gutanga inyigisho n’ubutumwa bwubaka abakristo mu minsi itatu y’iki gitaramo.

Nyota ya Alfajiri, Siyoni, Asmos n’ayandi makorali mu bazasusurutsa Himbaza Gospel Fest

Amakorali n’amatsinda atandukanye arimo Nyota ya Alfajiri Choir ADEPR Gatenga, Siyoni Choir ADEPR Jenda, Asmos Choir ADEPR Nyakabanda, Lehi Choir ADEPR Kamuhoza, Jehovah Jireh Choir ADEPR Kamuhoza ndetse na Hermon Choir ADEPR Kamuhoza nayo igeze kure imyiteguro yo kwitabira iki gitaramo. Biteganyijwe ko aya makorali azatanga umusanzu ukomeye mu kuramya no guhimbaza Imana.Abateguye iki gitaramo bagaragaje ko gahunda zacyo zizaba mu bihe bitandukanye.

Ku wa Gatanu, tariki ya 21 Kanama, kizatangira saa 16:00 kugeza saa 21:00, mu gihe ku wa Gatandatu no ku Cyumweru kizaba kuva saa 14:00 kugeza saa 20:00. Ibi biha abakristo n’abandi bakunzi b’umuziki wa gospel amahirwe yo kwitabira igikorwa mu gihe kiboroheye.

Himbaza Gospel Fest ni kimwe mu bikorwa byitezweho guhuza abakristo mu mwuka wo kuramya, gusenga no gukomeza kwizera. Himbaza Family Choir na ADEPR Kamuhoza barahamagarira abantu b’ingeri zitandukanye kuzitabira iyi minsi itatu, kugira ngo bifatanye mu guhimbaza Imana no kwakira ubutumwa buzanyuzwa mu ndirimbo, inyigisho n’amasengesho.

Himbaza Gospel Fest 2026 igiye kuba Ihuriro ry’amakorali, abashumba n’abakunzi b’umuziki wo kuramya no guhimbaza Imana