Nyuma y’imyaka 34 babana bitemewe n’amategeko, Mudenge na Vestine bakoze ubukwe bafashijwe na ADEPR

Mudenge Hamisi na Mujawayezu Vestine bamaze imyaka 34 babana, bakoze ubukwe nyuma y’igihe kirekire bategereje amahirwe yo gusezerana, babifashijwemo na ADEPR Paruwasi ya Remera.

Aba bombi bari mu miryango 196 yasezeranye imbere y’Imana n’imbere y’amategeko mu muhango wabereye kuri Paruwasi ya Remera, mu Karere ka Gasabo, ku wa Gatandatu tariki ya 22 Kanama 2026.

Muri abo basezeranye, imiryango 96 yasezeranye imbere y’amategeko, mu gihe abandi bakoze umuhango wo gusezerana imbere y’Imana.

Mu nkuru dukesha Igihe, Mudenge Hamisi yavuze ko gukora ubukwe nyuma y’imyaka 34 babana ari ibyishimo bidasanzwe, kuko bari barabiteganyije inshuro nyinshi ariko ntibabigereho.

Ati: “Ntabwo nabona uko mbivuga kuko ni ibyishimo bidasanzwe, kuko twateganyije kenshi kubikora ariko bikanga. Twabanye kuva mu 1992, uri kumva ko igihe gishize ari kinini, byari ngombwa ko natwe tubana byemewe n’amategeko.”

Uyu muhango wabaye umwanya wo gushyira ku murongo ubuzima bw’imiryango bwari bumaze imyaka myinshi bushingiye ku kubana, ariko batari barabonye uburyo bwo gukora ubukwe nk’uko babyifuzaga.

ADEPR Paruwasi ya Remera yafashije iyi miryango mu rwego rwo kubafasha kubaka ingo zishingiye ku masezerano, inshingano no kubahana, cyane ko ubuyobozi bw’itorero buvuga ko umuryango ufite uruhare rukomeye mu mibereho myiza y’abantu.

Umushumba Mukuru wa ADEPR mu Rwanda, Pasiteri Ndayizeye Isaie, yavuze ko umuryango ari ishingiro ry’iterambere ry’igihugu n’itorero, bityo ko gukomeza ingo ari inshingano ikwiye kwitabwaho.

Ati: “Umuryango ni ishingiro ry’iterambere yaba ku gihugu no ku itorero. Ibyo dushaka byose ni bishingira. Imiryango iri kugenda yangirika, ni yo mpamvu natwe twafashe intego yo guhindura abantu mu buryo bwuzuye.”

Yavuze kandi ko kubana hatabayeho isezerano bishobora kugira ingaruka ku mibanire y’abashakanye ndetse no ku hazaza h’abana.

Ati: “Iyo imiryango ibanye itarasezenye bituma nta cyizere igirana, abana nta hazaza baba bafite. Iki gikorwa rero ni imwe mu ntambwe zo kubafasha kwita ku ngo zabo no kubana neza.”

Ku wa Gatandatu, Paruwasi ya Remera yahaye amahirwe imiryango yari imaze igihe ibana itarakoze ubukwe.

Ibi bibaye mu gihe ikibazo cy’amakimbirane mu miryango n’ubutane gikomeje kuba kimwe mu bibazo byugarije ingo mu Rwanda. Mu mezi atandatu ya mbere ya 2026, inkiko zo mu Rwanda zitangaza ko zakiriye imanza 3.620 zisaba ubutane bwa burundu.

Ku muryango wa Mudenge na Vestine, nyuma y’imyaka 34 babana, uyu muhango wabaye intambwe yihariye yo gushyira umubano wabo ku murongo w’amategeko n’uw’ukwemera, ndetse no kwizihiza imyaka myinshi bamaze bubakira ubuzima hamwe.