Kuva muri Sainte-Famille kugera kuri Saint-Michel: urugendo rw’imyaka 60 rwa Chorale de Kigali

Chorale de Kigali igiye kwizihiza imyaka 60 imaze mu muziki Chorale de Kigali, imwe mu makorali akomeye kandi afite amateka maremare mu Rwanda, yatangaje igitaramo cyihariye cya Noheli kizaba ku wa 20 Ukuboza 2026, kikabera muri Kigali Convention and Exhibition Village (KCEV), Camp Kigali. Iki gitaramo kizaba mu bikorwa byihariye byo kwizihiza imyaka 60 iyi korali imaze ishinzwe.Chorale de Kigali yashinzwe mu 1966 muri Paruwasi Sainte-Famille i Kigali, ishingwa n’abanyamuziki b’Abanyarwanda bari barize mu maseminari no mu mashuri y’abamisiyoneri.

Mu bantu bagize uruhare mu ishingwa ryayo harimo Professeur Paulin Muswahili, Saulve Iyamuremye, Matthieu Ngirumpatse, Célestin Nkaka na Henry Nzajyibwami.Mu myaka ya mbere, Chorale de Kigali yari igizwe n’abagabo gusa, ariko mu 1987 yatangiye kwakira abaririmbyi b’abagore. Muri uwo mwaka kandi yabonye ubuzima gatozi nk’umuryango udaharanira inyungu. Mu mateka yayo, imwe mu ntera ikomeye yagezeho ni ukuririmbira mu Misa yari iyobowe na Papa Yohani Pawulo wa Kabiri ubwo yasuraga u Rwanda mu 1990.

Uko Chorale de Kigali yabaye inkingi y’umuziki wa kiliziya mu Rwanda

Kuva icyo gihe, iyi korali yakomeje kugira uruhare mu iterambere ry’umuziki wa kiliziya, cyane cyane umuziki w’amajwi menshi ndetse n’umuziki wa kera. Ubu ikorera kuri Cathédrale Saint-Michel muri Nyarugenge, Kigali, ikaba ihuriza hamwe abaririmbyi bagera kuri 150 bafite hagati y’imyaka 17 na 70, barimo abanyeshuri, abanyamwuga n’abakozi bo mu nzego zitandukanye.

Chorale de Kigali izwi cyane ku buryo ihuza indirimbo za litirijiya Gatolika n’iz’umuziki wa kera ndetse n’izindi ndirimbo z’abahanzi. Mu ndirimbo zayo harimo iz’umuco n’umuziki wera nyarwanda, ndetse n’ibihangano bikomeye byo mu muziki w’Abanyaburayi birimo Va, pensiero ya Giuseppe Verdi na Messiah ya George Frideric Handel.

Mu bikorwa byayo ngarukamwaka, igitaramo cya Christmas Carols Concert ni kimwe mu bikurura abantu benshi, aho cyagiye kibera ahantu hakomeye nka KCEV na BK Arena. Korali kandi igira uruhare mu birori byo kwizihiza umunsi w’Assomption ku wa 15 Kanama, umunsi usanzwe uhurirana no kwizihiza isabukuru yayo.

Imyaka 60 y’amateka: Chorale de Kigali igiye kwizihiza isabukuru idasanzwe

Mu gihe yitegura kwizihiza imyaka 60, Chorale de Kigali ikomeje kugaragaza uruhare rwayo mu kubungabunga no guteza imbere umuziki w’amakorali mu Rwanda. Ifite imizingo y’indirimbo irenga 13 yamaze gufata amajwi, kandi ibihangano byayo biboneka ku mbuga zitandukanye z’umuziki. Igitaramo cya Noheli cyo ku wa 20 Ukuboza 2026 rero gitegerejwe nk’umwanya wo kwizihiza amateka yayo, gusangira n’abakunzi b’umuziki ndetse no kwerekana urugendo rw’imyaka 60 rw’umuziki wuzuyemo ubudasa.