Urubyiruko rwa Arkidiyosezi ya Kigali rugiye gutera ibiti 50.000 mu maparuwasi 45

Urubyiruko rwa Arkidiyosezi ya Kigali rwatangije umushinga wo gutera ibiti 50.000 mu maparuwasi 45 agize iyi Arkidiyosezi, mu rwego rwo kwizihiza Yubile y’imyaka 50 imaze ishinzwe no gusiga umurage uzafasha ibisekuru bizaza kubungabunga ibidukikije.

Umushinga witwa “50 Years – 50,000 Trees Project” watangijwe ku wa Gatandatu, tariki ya 7 Ugushyingo 2026, mu Kigo cy’Amashuri y’Imyuga n’Ubumenyingiro cya TVET Butamwa, giherereye muri Paruwasi ya Butamwa.

Intego yawo ni ugutera ibiti 50.000 mu maparuwasi yose agize Arkidiyosezi ya Kigali, bikazagira uruhare mu kurengera ibidukikije no guteza imbere imibereho y’abaturage.

Iki gikorwa cyitabiriwe na Minisitiri w’Ubutegetsi bw’Igihugu, Hon. Dominique Habimana, Abepisikopi n’abapadiri, abiyeguriye Imana, inzego z’umutekano zirimo Ingabo na Polisi by’u Rwanda, urubyiruko ndetse n’abandi bafatanyabikorwa.

Mu butumwa bwe, Arikiyepisikopi wa Kigali, Antoine Karidinali Kambanda, yagaragaje ko gutera ibiti atari igikorwa gisanzwe, ahubwo ari uburyo bwo kugaragaza ko abantu bashimira Imana binyuze mu kwita ku byo yaremye.

Yashimangiye kandi ko kuba urubyiruko ari rwo rwateguye uyu mushinga bifite igisobanuro gikomeye, kuko ari rwo ruzakomeza umurage wa Kiliziya mu myaka iri imbere.

Yagize ati “Imyaka 50 irashize Arkidiyosezi ya Kigali ishinzwe, imyaka y’ukwemera n’ukwizera, ihumure mu butumwa bwacu nka Kiliziya, kuremamo abantu umuryango wa kivandimwe babana mu rukundo n’amahoro, imyaka y’iterambere.

Ni ibyo gushimira Imana kandi ni ibyo tumaze hafi uyu mwaka dukora, twizihiza Yubile mu buryo bunyuranye, mu ma Paruwasi yose, mu bikorwa binyuranye.

Yakoje agira ati “Uyu munsi rero tukaba duhuriye aha ng’aha muri Paruwasi ya Butamwa, muri iki kigo cy’urubyiruko cya Arkidiyosezi ya Kigali, mu gikorwa gikomeye cyane cyo kwita ku biremwa no ku bidukikije, dutera ibiti nk’igikorwa cya Yubile.”

Karidinali Kambanda yibukije urubyiruko ko iyi Yubile ifite igisobanuro cyihariye kuri rwo, kuko ari rwo ruzakomeza guhererekanya amateka n’indangagaciro bya Arkidiyosezi ya Kigali. Yavuze ko ibiti bazatera bizaba ari ikimenyetso kizibutsa uruhare rwabo mu kwizihiza iyi myaka 50, ndetse n’inshingano bafite zo gukomeza kubungabunga ibidukikije.

Yagize ati “Rubyiruko, kuko Yubile ni iyanyu ku buryo bw’umwihariko. Yubile yizihizwa nyuma y’imyaka 25, 50. Ubu rero nyuma y’imyaka 25 ni mwebwe muzaba mubwira abandi uko Yubile yagenze.

N’iki gikorwa dukoze, ibi biti duteye mukazagaruka kureba aho bigeze. Nanone nyuma y’imyaka 50 bamwe muri mwe muzaba mugihari, mufite imyaka 70, 65, ku buryo rero ibi dukora ni umurage, kugira ngo namwe muzabikomeze.”

Laudato Si ishimangira inshingano zo kurengera ibidukikije

Mu gusobanura impamvu Kiliziya ishyira imbere ibikorwa byo kubungabunga ibidukikije, Karidinali Kambanda yifashishije inyandiko ya Papa Fransisiko yitwa Laudato Si, yasohotse mu 2015. Iyo nyandiko igaruka ku nshingano abantu bafite zo kurengera isi, ibinyabuzima n’ibindi biremwa Imana yabahaye.

Yasobanuye ko ububasha Imana yahaye umuntu ku biremwa butagamije kumufasha kubyungukiramo ku nyungu ze bwite, ahubwo bugomba kumutera kubibungabunga no kubibyaza umusaruro mu buryo burambye.

Yagize ati “Mu mwaka wa 2015, Papa Fransisiko yahaye Kiliziya n’isi yose ubutumwa bukomeye mu nyandiko yise ‘Laudato Si’, mu rurimi rw’Ikiratini. Ugenekereje mu Kinyarwanda bivuga ngo ‘Singizwa Nyagasani’, kuko ibiremwa bisingiza Imana. Dufatanya na byo gusingiza Imana.”

Yakomeje asobanura ko umuntu afite inshingano zo kuba umurinzi w’ibiremwa aho kubifata nk’ibikoresho byo kwikungahaza.

Yagize ati “Imana yaremye umuntu imuha ububasha ku biremwa byayo ngo abibere umuyobozi, abibere umuvugizi mu gusingiza Imana. Muri uru rwandiko adushishikariza twese gukomera ku nshingano zacu Imana yaduhaye iturema, zo kwita ku bindi biremwa, agira ati ‘Kurengera isi inzu yacu rusange’.

Yongeyeho ati “Ububasha Imana yahaye muntu si ubwo gukoresha ibidukikije ku nyungu zacu bwite, ahubwo ni inshingano zo kubyitaho no kubibungabunga.”

Karidinali Kambanda yakoresheje urugero rw’igiti cy’avoka agaragaza akamaro ibiti bifitiye abantu. Yavuze ko ibiti bitanga umwuka mwiza, bikagira uruhare mu kubona ibiribwa no kurengera ubuzima. Bityo, umuntu wungukira ku biti akwiye no kumva inshingano zo kubitaho.

Yagize ati “umuntu wese uzajya asoroma avoka ku giti, akayirya akunguka ku buzima bwayo, akwiriye kujya yibuka ko afitanye isano na cyo, bityo akacyitaho kandi akakibungabunga.

Urubyiruko rwasabwe kwita ku biti ruzatera

Uretse gushishikariza urubyiruko gutera ibiti, Karidinali Kambanda yarusabye no gukurikirana imikurire yabyo kugira ngo uyu mushinga uzagere ku ntego zawo.

Yagaragaje ko gutera igiti bidahagije iyo hatabayeho kugikurikirana, kukuhira, kukibagarira no kukirinda kwangizwa. Ibi ni ingenzi kugira ngo ibiti bizaterwa bizashobore gukura kandi bigire uruhare rurambye mu kubungabunga ibidukikije.

Yibukije kandi urubyiruko kwirinda ibiyobyabwenge n’inzoga, gufata inshingano no kwitegura kuzagira uruhare mu miyoborere y’igihugu n’iterambere ry’umuryango.

Mu gushimangira ubutumwa bwe, yifashishije inyandiko ya Papa Fransisiko y’urubyiruko yitwa Christus Vivit, yasohotse mu 2019, agaragaza ko urubyiruko rukwiye kugira uruhare mu guhindura isi ahantu heza kurusha uko rwayisanze.

Yagize ati “urubyiruko rukwiye gukora neza aho ruri hose, kugira ngo abazaza nyuma yarwo bazasange isi ibungabunzwe kandi imeze neza.

Ubu butumwa bugaragaza ko umushinga wo gutera ibiti 50.000 utagamije kwizihiza Yubile gusa, ahubwo unagamije guha urubyiruko uruhare mu bikorwa bifatika byo guhangana n’ibibazo byangiza ibidukikije.

Minisitiri Habimana yashimye uruhare rwa Kiliziya mu kubungabunga ibidukikije

Minisitiri w’Ubutegetsi bw’Igihugu, Hon. Dominique Habimana, yashimye Arkidiyosezi ya Kigali ku gitekerezo cyo gutangiza umushinga wo gutera ibiti 50.000, avuga ko ari umusanzu ukomeye mu kurengera ibidukikije no guteza imbere imibereho y’abaturage.

Yagaragaje ko uyu mushinga uje mu gihe u Rwanda na rwo rwashyize imbere ibikorwa byo kongera amashyamba no gutera ibiti. Muri icyo gihe, igihugu cyari gifite gahunda yo gutera ibiti miliyoni 100 mu gihembwe cy’ihinga cyari cyatangijwe.

Minisitiri yashimangiye akamaro k’ubufatanye hagati ya Leta, amadini n’amatorero ndetse n’abaturage mu gushyira mu bikorwa gahunda zigamije iterambere rirambye. Yagaragaje ko ibikorwa nk’ibi bifasha guhuza imbaraga z’inzego zitandukanye mu gukemura ibibazo byugarije ibidukikije.

Umushinga uzatangirira ku biti 1.000 muri Butamwa

Umushinga wa “50 Years – 50,000 Trees Project” watangiriye muri Paruwasi ya Butamwa, aho urubyiruko rwatangiye rutera ibiti 1.000. Nyuma yaho, uzakomereza mu yandi maparuwasi 44 agize Arkidiyosezi ya Kigali kugeza intego yo gutera ibiti 50.000 igezeho.

Uretse kurengera ibidukikije, uyu mushinga ushobora no kugira uruhare mu guteza imbere ubukungu binyuze mu kongera ibiti by’imbuto, kubungabunga ubutaka no gufasha abaturage kubona umusaruro uzabafasha mu mibereho yabo.

Gusa, kugira ngo ugere ku ntego, bizasaba ko buri paruwasi igira gahunda yo gukurikirana ibiti byatewe, kumenya uko bikura no gusimbuza ibyangiritse. Ubufatanye bw’urubyiruko, abayobozi ba Kiliziya n’abaturage buzaba ingenzi mu gutuma uyu murage uramba.

Arkidiyosezi ya Kigali yifuza ko ibiti 50.000 bizaba ikimenyetso cy’uruhare rw’urubyiruko mu kwizihiza Yubile y’imyaka 50, ariko nanone bikazaba umurage w’abazakurikiraho. Ni igikorwa kigamije kugaragaza ko kwizihiza Yubile bitagarukira ku birori n’amasengesho, ahubwo ko bishobora no gutanga umusanzu ugaragara mu iterambere ry’abaturage no kurengera isi.