
Ikipe ya Crystal Palace yatsinze Liverpool maze yegukana igikombe itwaye bwa mbere mu mateka
Crystal Palace yegukanye Igikombe cya Community Shield bwa mbere mu mateka, nyuma yo gutsinda Liverpool kuri penaliti 3-2, nyuma y’uko iminota 90 y’umukino yarangiye amakipe yombi anganyije ibitego 2-2.
Ni mu mukino wabereye i Wembey kuri iki Cyumweru, tariki ya 10 Kanama 2025,ubanzirizwa n’umwanya wo kwibuka Diogo Jota wakiniraga Liverpool na murumuna we Andre Silva bitabye Imana bazize impanuka.
Igikombe cya Community Shield gikinirwa n’ikipe yatwaye Shampiyona n’iyatwaye FA Cup mu mwaka w’imikino uba wabanjirije uwo mukino.
Liverpool yatwaye Shampiyona, yihariye umukino ndetse ku munota wa kane Umufaransa Hugo Ekitike uherutse kugurwa n’iyi kipe yari yamaze kuyibonera igitego cya mbere.
Crystal Palace na yo ntiyatinze kuwinjiramo kuko yabonye igitego cyo kwishyura ku munota wa 17, kivuye kuri penaliti yatewe na Jean-Philippe Mateta nyuma y’ikosa ryakozwe na Virgil van Dijk mu rubuga rw’amahina.
Kwinjizwa iki gitego ntabwo byaciye intege Liverpool kuko nyuma y’iminota ine yahise ishyiramo icya kabiri cyatsinzwe na Jeremie Frimpong wateye umupira mu izamu ujyamo kubera guhagarara nabi k’umunyezamu wa Crystal Palace, Dean Henderson.
Uko ni ko igice cya mbere cyarangiye, mu cya kabiri impande zombi zikoramo impinduka, aho Liverpool yakuyemo Curtis Jones na Hugo Ekitike ashyiramo Wataru Endō na Alexis Mac Allister, mu gihe Crystal Palace yakuyemo Tyrick Mitchell aha umwanya Borna Sosa.
Impinduka zabyaye umusaruro ku ruhande rwa Crystal Palace kuko yatsinze igitego cya kabiri ku munota wa 77, cyinjijwe na Ismaïla Sarr ahawe umupira na Adam Wharton. Iki gitego cyatumye amakipe yombi asoza umukino anganya ibitego 2-2.
Liverpool yitwaye nabi mu mwanya wo gutera penaliti, aho Mohamed Salah utagize umukino mwiza kuri uyu munsi, Alexis Mac Allister na Harvey Elliott bazihushije, bihesha igikombe Crystal Palace nyuma yo kwinjiza 3-2.
Izi ni intangiriro nziza ku mwaka w’imikino wa 2025/26 kuri Crystal Palace yegukanye iki gikombe ku nshuro ya mbere mu mateka.