Miss Universe 2025 Fátima Bosch Yagaragaje Ukwizera Kwe Nyuma yo Kwegukana Ikamba
Umwamikazi w’isi mu mwaka wa 2025 yashimye Imana ku mugaragaro, ahamya ko Kristo ari Umwami nubwo irushanwa ryari ryuzuyemo amakimbirane
Nyuma yo kwegukana ikamba rya Miss Universe 2025 mu irushanwa ryaranzwe n’amakimbirane, Fátima Bosch ukomoka muri Mexique yagaragaje ukwizera kwe abinyujije ku mbuga nkoranyambaga, aho yashyize ubutumwa buhamya ko Imana ari yo yatumye atsinda. Ku wa 21 Ugushyingo 2025, yashyize kuri Instagram amagambo agira ati: “Umwami Kristo arakarama,” ashimira Imana kuba yamuhaye intsinzi.
Mu butumwa bwe, Bosch yagize ati: “Icyo Imana yakugeneye ishyari ntirishobora kugihagarika, amahirwe ntiyagihindura.” Yaherekejwe n’amafoto amugaragaza yakira ikamba, asezera abakunzi be ndetse ari kumwe n’abandi bakobwa bahanganye. Yakurikijeho indi foto yambaye ikamba, yongeraho ko “Imana izi byinshi kuri wowe kuruta ibyo abandi batekereza.”
Bosch, wavukiye i Villahermosa muri Tabasco, azwi nk’Umukirisitu Gatolika udahisha ukwizera kwe. Akimara gutangazwa nk’uwatsinze, yakoze ishusho ya Roho Mutagatifu, ashimira Imana ku mugaragaro.
Urugendo rwe ntirwari rworoshye, cyane ko mu byumweru bibanziriza irushanwa yavuzwe cyane ku mbuga nkoranyambaga ubwo yasohokaga mu nama ya Miss Universe yo ku wa 4 Ugushyingo nyuma yo kwibasirwa n’umuyobozi w’irushanwa, Nawat Itsaragrisil, wamushinje kutamamaza Thailand. Byakomeye ubwo yamwise “dummy,” maze we amusubiza ati: “Mfite ijwi, kandi ntiwubaha abagore.”
Nubwo ibibazo byabaye byinshi, Bosch yinjiye mu ruhando rw’abanyamideli bagaragaje ko ukwizera ari inkingi yabo. Aho yunganirwa na Demi-Leigh Tebow, Miss Universe 2017, wasobanuye ko agaciro k’umuntu gatangwa n’Imana atari ikamba. Tebow yavuze ko buri cyumweru atangira asiba ibinyoma no gushidikanya, akabisimbuza ukuri ko muri Bibiliya, yibutsa ko “abizera batowe kandi bafite agaciro imbere y’Imana.”
Intsinzi ya Fátima Bosch yigaragaje nk’ubuhamya bw’umukobwa udatinya guhagarara ku kuri kwe, nubwo ubwiza, politiki n’amakimbirane byari byiganje mu irushanwa rikomeye kurusha ayandi ku isi.
