“Kwigisha abafite ubumuga ntabwo ari impuhwe ahubwo ni inshingano” Nsengimana Joseph
Minisitiri w’Uburezi, Nsengimana Joseph, yagaragaje ko kwigisha abantu bafite ubumuga atari impuhwe igihugu kiba kibagiriye, ahubwo ari inshingano kuko uburezi budaheza bukubiyemo ibyiciro byose.
Ni ubutumwa yatanze ku wa 27 Ugushyingo 2025 ubwo hatangizwaga ibiganiro by’iminsi ibiri ku byerekeye politiki y’uburezi budaheza by’umwihariko ku bafite ubumuga.
Ni ibiganiro byabereye i Kigali ku nshuro ya kabiri, byibanda ku gusuzuma aho iyo politiki igeze ishyirwa mu bikorwa, ndetse n’ibikeneye kongerwamo ingufu.
Minisitiri Nsengimana yavuze ko kugeza ubu mu mashuri arenga 5000 Igihugu gifite hari umwarimu nibura umwe ufasha kumenya abana bafite ubumuga, bigatuma hamenyekana uburyo bwihariye bafashwamo mu masomo kugira ngo badasigara inyuma.
Yavuze ko ko ubu hari utumashini tumaze kugezwa mu bigo 73 dufata inyandiko iri ku rupapuro rusanzwe tukayishyira mu nyandiko isomwa n’abafite ubumuga bwo kutabona bakoresheje intoki, izwi nka ‘braille’ bigafasha abo bana kwiga neza.
Yashimangiye kandi kwigisha abafite ubumuga atari impuhwe ahubwo ari inshingano Igihugu gifite yo kubitaho nk’abandi banyarwanda.
Ati “Kwigisha abana bafite ubumuga si impuhwe, ahubwo ni inshingano nk’uko twigisha abana bose. Abo bana ni bo Rwanda rw’ejo. Tutabigishije nta cyo tuba dutegurira Igihugu. Ni ngombwa ko twigisha abana bose kuko ari yo gahunda ya Leta.”
Umunyamabanga Nshingwabikorwa w’Inama y’Igihugu y’Abafite Ubumuga, Ndayisaba Emmanuel, yavuze ko abafite ubumuga bishimira byinshi bakorewe mu gihugu haba bijyanye n’uburezi, umurimo, siporo, ubuvuzi nko kubona insimburangingo n’inyunganirangingo ku bwishingizi n’ibindi.
Umwarimu ufite ubumuga bwo kutabona witwa Nyirahabinshuti Beatha, umaze imyaka ine yigisha kuri GS Gisozi I mu Mujyi wa Kigali, yabwiye IGIHE ko ubumuga butambura umuntu ubushobozi.
Ati “Iwacu ni i Karongi. Nasoje amashuri yisumbuye nza gushaka akazi nk’abandi bose. Numvise ko hari ikizamini cy’akazi nza guhatana n’abandi ndagitsinda. Ubu nigisha Icyongereza mu mwaka wa kane w’amashuri abanza. Akazi sinakabonye ku bw’impuhwe REB yabonye ko nshoboye irakampa kandi n’abanyeshuri mbigisha neza cyo bamfasha gusa ni ukwandika ku kibaho.”
Nyirahabinshuti ariko yasabye inzego zibishinzwe kongera ibikorwaremezo byorohereza abafite ubumuga gukora akazi, kuko mu bigo bimwe by’amashuri nta nzira zabugenewe zihari.
Abizeyimana Justin, wize kwigisha abana bafite ubumuga ukorera ku ishuri rya Umubano Academy i Kanombe, yavuze ko abona hari imbogamizi yo kuba abana bafite ubumuga bahabwa ibizamini bimwe n’icy’abatabufite kandi batiga kimwe. Avuga ko bakwiye kujya babazwa mu buryo bwihariye kuko rimwe na rimwe bo baba batabonye ibikoresho byabugenewe byo kwigiraho ngo bige neza ibyo babazwa mu bizamini bya Leta.
Umwana Simununa Benitha ufite ubumuga bwo kutumva, wiga mu mashuri abanza, akoresheje ururimi rw’amarenga, yagaragaje ko mu myigire yabo batoroherwa no gutumanaho n’abandi bana kuko batazi ururimi rw’amarenga.
Yavuze ko na bamwe mu balimu batazi amarenga, bigatuma biyambaza abana bagenzi babo ngo babafashe mu gusobanukirwa ibyigishijwe, aboneraho gusana ko hashyirwa imbaraga mu kwigisha urwo rurimi n’abandi bakarugiraho ubumenyi.
