“Niwe Healing Concert”: Ijoro ry’Amateka kuri Richard Ngendahayo wujuje BK Arena Ibyishimo n’Amateka Mashya
3 mins read

“Niwe Healing Concert”: Ijoro ry’Amateka kuri Richard Ngendahayo wujuje BK Arena Ibyishimo n’Amateka Mashya

Ijoro ryo ku wa 29 Ugushyingo 2025 ryasize amateka adasanzwe muri BK Arena, ubwo Richard Nick Ngendahayo yasubiriraga imbere y’Abanyarwanda nyuma y’imyaka 17 atari yongera kubaririmbira mu gihugu. Igitaramo cye, yacyise “Niwe Healing Concert”, cyahurije hamwe abaririmbyi bakomeye ndetse n’ibihamya by’ubuzima bwe bw’umurimo w’Imana bwamaze imyaka myinshi.

Ngendahayo yageze ku rubyiniro aherekejwe na Gabby Kamanzi, umwe mu bahanzi bafatanyije gukora Album ye ya mbere “Niwe”. Kuva ku ndirimbo ya mbere kugeza ku ya nyuma, aba bombi basangiye urubyiniro mu gitaramo cyacengeje umwuka wo kuramya n’ugukomeza imitima y’abari aho.

Indirimbo nka Si Umuhemu, Yesu Ndagushima, Ntarindi Zina n’izindi zatumye abantu bahaguruka mu buryo budasanzwe, zibahuriza mu mwuka wo gushima no gukira imitima. Indirimbo Si Umuhemu by’umwihariko ni yo yagarutse kenshi kubera uburyo abakunzi ba Richard Ngendahayo bayakiraga bafite amarangamutima akomeye.

Ngendahayo yabwiye imbaga ko hari ibonekerwa yabonye mu myaka 25 ishize, ahamya ko ibyo yabonye byamuhaye imbaraga zo gukomeza kugeza ubutumwa bw’Imana ku mbaga. Yanatangaje ko hari ibindi bizatangazwa mu minsi iri imbere bijyanye n’urugendo rwe rw’umurimo w’Imana.

Gabby, wigeze gufasha Ngendahayo mu mushinga we mu myaka ya 2004–2005, yavuze ko icyo gihe yabonye ko uyu muhanzi afite umuhamagaro udasanzwe. Yavuze ko impano n’umwuka Ngendahayo aririmbana ari ibintu byamuteye kumwemera no kumutera inkunga kuva kera.

Mu bindi byaranze iki gitaramo harimo no kugaragara kwa Pastor Julienne Kabiligi Kabanda, washinze Grace Room Ministries. Yageze ku rubyiniro atunguranye, yakirwa n’urukumbuzi n’ibyishimo by’abamubonaga nyuma y’igihe kitari gito atitabira ibitaramo binini.

Yavuze ko Imana yamuhaye ubutumwa bwihariye bwari bugenewe uwo mugoroba, nubwo atari yiteze kuzahabwa umwanya wo kubwiriza. Yifashishije Luka 15 agaruka ku mugani w’umwana w’ikirara, asaba abitabiriye gufata umwanya wo kwisuzuma no kongera kubaka umubano wabo n’Imana mu mpera z’umwaka.

Mbere yaho, Iradukunda Rene Patrick ni we watangije ibirori ku rubyiniro. Aririmbana n’umugore we Tracy Agasaro, batumye BK Arena yuzura umunezero n’umwuka w’ubumwe.

Ubwo Tracy yazamukaga ku rubyiniro bagafatanya kuririmba, abantu bahagurukiye rimwe barasenga, bacana amatoroshi ya telefone zabo mu buryo bwabereye igitaramo cy’umwuka kirushaho kugira ishusho yihariye.

Rene Patrick na Tracy, bakoranye umuziki kuva mu 2023, berekanye ko umuryango ushobora kuba urufatiro rw’ubutumwa bw’Imana n’ubusabane.

Igitaramo Niwe Healing Concert cyasize abitabiriye bafite amarangamutima akomeye, benshi bishimira kubona umuhanzi bari bategereje imyaka myinshi. Igitaramo cyahuje urukumbuzi, ubutumwa no gukira imitima, gituma benshi bemeza ko cyanditse amateka mashya mu muziki wo kuramya no guhimbaza Imana mu Rwanda.

Richard Nick Ngendahayo yavuze ko urugendo rwe rwinjiye mu gice gishya, kandi ko hari byinshi azageza ku Banyarwanda mu minsi iri imbere bijyanye n’ibyo Imana yamukoreye n’ibyo yamuhishuriye.

Richard Ngendahayo yataramiye abitabiriye mundirimbo nka Si Umuhemu, Yesu Ndagushima, Ntarindi Zina n’izindi zatumye abantu bahaguruka mu buryo budasanzwe

Niwe Healing Concert ni igitaramo cyagaragaje ubwitabire buhambaye aho BK Arena yari yuzuye

Gabby Kamanzi, umwe mu bahanzi bafatanyije gukora Album ye ya mbere “Niwe” nawe yafatanyije na Richard Ngendahayo kurubyiniro

Rene Patrick ku rubyiniro yaririmbye nyinshi mu ndirimbo zamamaye cyane muri Bibiliya n’izindi zinyuranye

Pasiteri Julienne yongeye kubwiriza ku ruhimbi rwa BK Arena nyuma y’igihe kinini ahakoreye ibiterane

Leave a Reply

Your email address will not be published. Required fields are marked *