Padiri Jean Pierre Nsabimana yagizwe umuyobozi mushya w’Iyamamazabutumwa rihuweho n’u Rwanda, RDC n’u Bubiligi
Padiri Mukuru wa Paruwasi ya Gikondo agiye kuyobora Intara yitiriwe Umuryango Mutagatifu mu butumwa bwagutse bw’iyogezabutumwa n’imiyoborere
Kuri uyu wa 22 Mutarama 2026, Umuryango w’Iyamamazabutumwa Gatolika uzwi ku izina ry’Abapalotini watangaje ko Padiri Jean Pierre Nsabimana, wari Padiri Mukuru wa Paruwasi ya Gikondo muri Arikidiyosezi ya Kigali, yagizwe Umuyobozi Mukuru w’Intara yitiriwe Umuryango Mutagatifu.
Iyi Ntara ihuriweho n’ibihugu bitatu birimo u Rwanda, Repubulika Iharanira Demokarasi ya Kongo n’u Bubiligi, bikaba ari icyizere gikomeye cyagaragajwe n’umuryango ku bushobozi n’ubunararibonye bw’uyu musaseridoti.
Nk’uko byatangajwe n’Umuryango w’Abapalotini, Padiri Jean Pierre Nsabimana azatangira ku mugaragaro izi nshingano nshya tariki ya 29 Mutarama 2026. Azakorana n’abajyanama bane bagizwe na Padiri Alphonse Ndagijimana, SAC; Padiri Abraham Buhendwa Nyange, SAC; Padiri Ildéphonse Bizimungu, SAC na Padiri Simon Safari Burhungane, SAC, bazafatanya mu kuyobora no gutanga icyerekezo cy’iyi Ntara mu bikorwa by’iyogezabutumwa n’imiyoborere.
Mu kiganiro yagiranye n’itangazamakuru, Padiri Jean Pierre Nsabimana yavuze ko yakiriye izi nshingano nshya abikunze kandi abifiteho igihunga, bitewe n’uburemere bw’inshingano zahawe.
Yagize ati: “Inshingano nk’izi umuntu azakirana ubwoba n’igihunga kuko ziba ari inshingano zikomeye, ariko akanazakira mu byishimo kuko zigaragaza ikizere umuryango n’abavandimwe bamugiriye.”
Yongeyeho ko yiteguye kwitanga no gukorana ubwiyoroshye, yishingikirije ku bufatanye n’abandi bapadiri n’abalayiki.
Agaruka ku cyerekezo n’ingamba azashingiraho mu butumwa bwe, Padiri Jean Pierre yavuze ko intego ye ari ugukomereza ku bikorwa byiza by’abamubanjirije, akibanda ku kubaka Umuryango w’Abapalotini, Kiliziya muri rusange n’Igihugu. Yashimangiye ko azashyira imbere ubumwe, ubufatanye n’ubwitange mu iyogezabutumwa, cyane cyane mu bihugu bitandukanye bigize iyi Ntara ayoboye.
Padiri Jean Pierre Nsabimana avuka muri Diyosezi ya Nyundo, Paruwasi ya Murunda. Yahawe ubusaseredoti tariki ya 12 Gicurasi 2001. Mu mateka y’ubutumwa bwe, yabaye Padiri wungirije muri Paruwasi ya Ruhango, ayobora Ingoro ya Yezu Nyirimpuhwe i Ruhango, anaba Umuyobozi wa Imprimerie et Editions Pallotti-Presse i Kigali.
Mbere yo kugirirwa icyizere cyo kuyobora Intara, yari Padiri Mukuru wa Paruwasi ya Gikondo ndetse n’Umujyanama wa mbere w’Umuyobozi Mukuru w’Umuryango.

Padiri Eugene Niyonzima wari umuyobozi mukuru w’umuryango w’abapalotini
Padiri Jean Pierre Nsabimana asimbuye Padiri Eugène Niyonzima wari umaze imyaka icyenda ayobora Umuryango w’Abapalotini, aho yatangiye kuwuyobora mu mwaka wa 2017. Abayobozi n’abagize umuryango bashimye umurimo Padiri Eugène yakoze mu gihe cy’ubuyobozi bwe, bavuga ko wasize umusingi ukomeye w’iterambere n’iyogezabutumwa.
Umuryango w’Iyamamazabutumwa Gatolika w’Abapalotini washinzwe na Mutagatifu Visenti Pallotti mu mwaka wa 1835 i Roma. Ufite intego eshatu z’ingenzi zirimo gukangurira abantu bose ukwemera n’urukundo bya Gikristu, gufasha Kiliziya mu iyogezabutumwa no mu bikorwa by’urukundo, ndetse no gukorana n’abalayiki mu gutanga serivisi zishingiye ku ndangagaciro za gikristu.
Izi ntego ni zo Padiri Jean Pierre Nsabimana azashingiraho mu kuyobora Intara yitiriwe Umuryango Mutagatifu mu gihe cy’ubutumwa bwe bushya.
