Korali Shalom yagarutse ku butumwa bw’ubugingo bw’iteka ibinyujije mu ndirimbo nshya “Ijambo Nyamukuru”
2 mins read

Korali Shalom yagarutse ku butumwa bw’ubugingo bw’iteka ibinyujije mu ndirimbo nshya “Ijambo Nyamukuru”

Indirimbo nshya ya Shalom Choir ishimangira ko ubugingo bw’iteka ari bwo butumwa bukomeye Abakristo bafite, ikibutsa ko ubuzima bwo ku isi budafite icyo bumaze iyo budaherekejwe no gushaka iby’ijuru.

Kuri uyu wa 28 Mutarama 2026, Shalom Choir yasohoye indirimbo yitwa “Ijambo Nyamukuru”, itanga ubutumwa bukomeye bwibutsa Abakristo ko intego nyamukuru y’ubuzima ari ugushaka ubugingo bw’iteka.

Iyi ndirimbo igaragaramo amagambo yimbitse atuma uwumvise yisuzuma, akibaza ku cyerekezo cy’ubuzima bwe n’icyo arimo guharanira, aho bagira bati: “Twabonye ibiri imbere, tubonayo ubugingo, tubonayo n’igihugu cyiza cy’abakijijwe.”

Mu magambo yayo, Shalom Choir ishimangira ko ubugingo bw’iteka ari bwo butumwa nyamukuru abakijijwe bafite, kuko iyo umuntu atabufite, imirimo yose akora iba nta gaciro ifite.

Iyi mvugo igaragariza abantu ko iby’isi bidashobora gusimbura iby’ijuru, bityo bakibutswa ko ubuzima bwo ku isi ari inzira iganisha ku buzima bw’iteka nk’uko indirimbo ibivuga iti: “Iyo tutabugira, ntituba twirushya.”

Indirimbo ikomeza igaragaza icyizere cy’abakijijwe, igira iti babona ibiri imbere yabo, bakabonamo ubugingo bw’iteka n’igihugu cyiza cyateguriwe ab’Imana. Ubu butumwa bwerekana icyerekezo cy’ukwemera, aho umuntu atareba gusa ku bibazo by’uyu munsi, ahubwo areba ku byiza by’ahazaza mu bwami bw’Imana.

Shalom Choir kandi yibutsa ko ababanjirije abandi mu nzira yo gukira babaye urugero rwiza rw’abakijijwe. Abo bantu bagaragazwa nk’intwari zahisemo gutanga ubuzima bwazo kubera ukwizera kwazo, bagaha agaciro ubugingo bw’iteka kurusha iby’isi, bityo bigatanga isomo rikomeye ku bakiri mu rugendo rw’ukwemera.

Usibye iyi ndirimbo, iyi korale imaze kwandika amateka mu Rwanda ndetse no hanze yarwo ifite izindi ndirimbo zirimo: Imva ye Irarangaye, Yampaye Ibimwuzuye, Yampinduriye Ubuzima n’izindi nyinzhi, zose zihurira ku kuba zitambutsa ubutumwa bwuzuye ihumure mu mwuka wera.

 “Ijambo Nyamukuru” ya Shalom Choir ni indirimbo ya Gospel itari iy’imiziki gusa, ahubwo ni ubutumwa bwimbitse buhamagarira abantu gusubiza amaso ku by’ingenzi mu buzima.

Ni indirimbo ishobora kuba isoko y’ihinduka mu mitima ya benshi, ibibutsa ko ubugingo bw’iteka ari bwo butumwa nyamukuru kandi bukaba intego ya buri mukristo.

Leave a Reply

Your email address will not be published. Required fields are marked *