Alarm Ministries yongeye guhembura abizera maze isohora indirimbo nshya “Mpora Mbiharira Yesu”
Iyi ndirimbo yasohotse none tariki ya 4 Gashyantare 2026, ikubiyemo ubutumwa bw’ukwiyegurira Imana, ikagaragaza uko kwizera Yesu bihinduka isoko y’ihumure, ibyishimo n’ukuruhuka k’umutima mu buzima bwa buri munsi.
Korali Alarm Ministries yasohoye ku mugaragaro indirimbo nshya yitwa “Mpora Mbiharira Yesu”, ikaba igaruka ku nsanganyamatsiko y’urukundo rw’Imana n’ukwiyegurira Yesu mu bihe byose by’ubuzima. Mu magambo yayo, iyi ndirimbo igaragaza ishusho y’umukristo uhitamo guhora hafi y’Imana, akayigira ubuhungiro n’isoko y’ihumure mu bihe by’ibyishimo n’ibigeragezo.
Alarm Ministries yerekana icyifuzo gikomeye cyo kugumana n’Imana, igira iti: “Nshaka guhorana nawe, nshaka kugumana nawe, muri wowe niho mwami, umutima uruhukira.” Aya magambo agaragaza uko umubano w’umuntu n’Imana ugaragara nk’ahantu h’ituze n’umutekano w’umutima, aho umuntu abona amahoro n’ituze adashobora kubonera ahandi.
Yagaragaje ko kwizera Yesu bihinduka isoko y’ibyishimo n’urukundo ruhoraho, iti: “Nagushaka sinkubure, nkanyurwa n’uko umba hafi.” Ibi byerekana ko urukundo rw’Imana rutagarukira ku magambo gusa, ahubwo rugaragarira mu mubano wa buri munsi wuzuyemo ibyishimo no kwiyumva hafi y’Imana.
Ubutumwa bukomeye bw’indirimbo bugaragarira no mu murongo ugira uti: “Mpora mbiharira Yesu niwe uzi uko amara agahinda mbabaye.” Aha, Alarm Ministries ishimangira ko kwiyegurira Yesu atari amagambo gusa, ahubwo ari imyanzuro y’ubuzima igamije kumugira umuyobozi n’umuhumuriza mu bihe byose, cyane cyane mu gihe cy’agahinda n’ibibazo.
Alarm Ministries ni korali imaze imyaka irenga 25 mu murimo w’Imana, aho usibye iyi ndirimbo nshya basohoye ifite n’izindi nyinshi zose zihurira ku kuba zitanga ihumure ku bizera.
Mu isohoka ry’iyi ndirimbo nshya, Alarm Ministries yongeye kugaragaza umwihariko wayo mu gutanga ubutumwa bwimbitse binyuze mu muziki wa gikirisitu, ihuza amagambo yuzuye ukwizera n’injyana ituma ubutumwa bugera ku mitima ya benshi.
“Mpora Mbiharira Yesu” itegerejweho gukomeza kuba indirimbo y’ihumure n’ukwizera ku bakristo benshi, ikabibutsa ko mu bihe byose by’ubuzima, kugumana na Yesu ari ho umutima uhurukira.
Reba indirimbo nshya “Mpora Mbiharira Yesu by Alarm Ministries
