Byinshi ku ndirimbo nshya “Ironkere Ishimwe” ibumbatiye ubutumwa bukomeye bwo guhimbaza no kwegera Imana
2 mins read

Byinshi ku ndirimbo nshya “Ironkere Ishimwe” ibumbatiye ubutumwa bukomeye bwo guhimbaza no kwegera Imana

Holi Worship Music Ft James & Daniella bakanguriye abakirisitu ko gushima Imana no kuyegera ari isoko y’amahoro n’agakiza.

Kuri uyu wa 24 Gashyantare 2026, itsinda ry’abaramyi bafatanyije na James & Daniella basohoye indirimbo nshya yitwa “Ironkere Ishimwe,” izanye ubutumwa bwiza bwo gushima Imana no kuyisanga nk’isoko y’ubugingo. Iyi ndirimbo igaruka ku rukundo n’imbabazi by’Imana, igahamagarira abakristo kuyegera badashidikanya, bayihimbaza buri munsi.

Muri iyi ndirimbo humvikana amagambo agaragaza Imana nk’ifite umutima w’impuhwe, idatererana uyigannye wese, ahubwo imwakirana urugwiro.

Ati: “Yewe Mwami, Mwami w’imbabazi, haruwagusanga ngo atahe amaramasa, harukomanga ngo we gukingura.”

Ubutumwa buyirimo bushishikariza abantu kutajya kure y’Imana ahubwo kuyisanga no kuyikomangaho bafite kwizera.

Ni indirimbo yibutsa ko umuntu wese wumva inyota y’umwuka adakwiye kwirengagiza isoko y’ubugingo, Bagaragaza ko Imana ari yo soko idakama, kandi ko kuyitera umugongo ari ukwiyima amahirwe yo kwakira ubuntu bwayo.

Bashimangira ko gushima Imana atari igikorwa cy’igihe gito, ahubwo ari umuco wa buri munsi. Mu nyikirizo yayo batera abayumva umutima wo guhimbaza no kwishimira ibyo Imana ikora, bakanashimangira ko gushima ari inkingi y’ubuzima bwa gikristo.

Holi Worship Music ni itsinda ry’abaramyi ritangiye kugenda ryandika izina mu muziki wo kuramya mu Rwanda, bafite izindi ndirimbo zirimo: Amaraso ye, Ndahimbaza Imana n’izindi, zose zihurira ku gutanga ubutumwa bw’ihumure.

Ku rundi ruhande, James & Daniella ni itsinda ry’abaramyi babiri bamaze gufatisha mu muziki wo kuramya no guhimbaza Imana mu Rwanda ndetse bakaba babana nk’umugabo n’umugore baririmbira hamwe. Bamenyekanye cyane mu ndirimbo nka Nzakugezayo, Rutare ndirimba, Rutanda Bugingo n’izindi nyinshi.

Ironkere Ishimwe ije ishimangira ko gushima Imana no kuyegera ari ishingiro ry’ubuzima bw’umukristo. Ubutumwa buyikubiyemo busaba buri wese guhishurirwa Kristo no kumenya impamvu y’umusaraba, kugira ngo ishimwe rimuve ku mutima no ku kanwa, nk’uko baririmba bati “Ngushime mu mutima, n’akanwa kanjye gahereko.”

Ni indirimbo ishobora gukomeza gufasha benshi kongera gusobanukirwa n’agaciro ko guhimbaza Imana no kuyubaha buri munsi.

Reba hano “Ironkere Ishimwe”

indirimbo “Nzakugezayo” yamenyekanishije cyane abaramyi James & Daniella basanzwe baririmbana ndetse bakaba umugabo n’umugore

Leave a Reply

Your email address will not be published. Required fields are marked *