Kwibuka Amateka ni inzira yo kubaka ubumwe n’ejo hazaza hatarangwamo urwango_Komisiyo y’Ubutabera n’Amahoro
2 mins read

Kwibuka Amateka ni inzira yo kubaka ubumwe n’ejo hazaza hatarangwamo urwango_Komisiyo y’Ubutabera n’Amahoro

Komisiyo y’Ubutabera n’Amahoro irasaba Abanyarwanda n’abakristu kwimakaza urukundo, kwamagana ingengabitekerezo ya Jenoside no kurera urubyiruko mu ndangagaciro z’ubumuntu.

Mu gihe u Rwanda n’Isi yose bibuka ku nshuro ya 32 Jenoside yakorewe Abatutsi mu 1994, Komisiyo y’Ubutabera n’Amahoro mu Nama y’Abepiskopi Gatolika mu Rwanda yibukije ko kwibuka atari ugusubiza inyuma amateka ahubwo ari amahirwe yo kubaka ubumwe n’amahoro arambye.

Ubutumwa bwatanzwe na Musenyeri Anaclet Mwumvaneza bushimangira ko kwibuka bikwiye gufatwa nk’inshingano rusange igamije kubaka ejo hazaza heza.

Musenyeri Mwumvaneza yavuze ko kwibuka amateka ashaririye igihugu cyanyuzemo bidakwiye gufatwa nko guhembera inzigo, ahubwo ko ari ugusigasira umurage w’abatabarutse no gukomeza kubungabunga isano y’Abanyarwanda. Ibi yabigarutseho mu butumwa iyi komisiyo yasohoye ku wa 6 Mata.

Mu butumwa bati: “Kwibuka amateka yacu ashaririye ntibigamije guhembera inabi n’inzigo, ahubwo ni inshingano yo gusigasira umurage w’abatabarutse no guhamya ko urupfu rudakuraho isano dufitanye.”

Komisiyo yihanganishije abarokotse Jenoside yakorewe Abatutsi, ibasaba gukomeza urugendo rwo kwiyubaka no gukira ibikomere, ibibutsa ko igihugu cyose kibari inyuma. Yagaragaje ko ubufatanye n’ubwiyunge bikomeje kuba inkingi ya mwamba mu gusana igihugu cyanyuze mu mateka akomeye.

Ubutumwa bwanagarutse ku mateka mabi Jenoside yasize, bugaragaza ko ari icyaha gikomeye cyakozwe n’abantu batatiye ubumuntu n’ubuvandimwe.

Icyakora, bwashimiye byimazeyo abagaragaje ubutwari bakarengera abahigwaga, bamwe bakemera no kubizira, buvuga ko ari urugero rwiza rwo gukurikizwa mu kubaka igihugu gishingiye ku rukundo n’ubutabera.

Komisiyo y’Ubutabera n’Amahoro yashimangiye ko hakiri inshingano ikomeye yo kurwanya no kwamagana abahakana cyangwa abapfobya Jenoside yakorewe Abatutsi mu 1994, ndetse n’abagifite ingengabitekerezo yayo.

Iti: “Dufite inshingano yo kwamagana abahakana n’abapfobya Jenoside yakorewe Abatutsi cyangwa abakirangwa n’ingengabitekerezo yayo,” ishimangira ko ibyo bikorwa bibangamira ubumwe n’iterambere ry’igihugu.

Abakristu basabwe kuba ku isonga mu kwimakaza indangagaciro z’urukundo, imbabazi n’amahoro, bakirinda amagambo n’ibikorwa byakomeretsa abandi. Hanatanzwe umwihariko ku babyeyi n’abarezi, basabwa kurera neza urubyiruko, barutoza gukunda igihugu no kubahana, kugira ngo amateka mabi Jenoside yasize atazongera kubaho ukundi.

Leave a Reply

Your email address will not be published. Required fields are marked *