Elayono Worship Family yateguje igitaramo cya “Ndi Uwe Live Concert” ku nshuro ya gatatu
Elayono Worship Family yateguje igitaramo cya “Ndi Uwe Live Concert” ku nshuro ya gatatuElayono Worship Family yatangaje ko iri gutegura igitaramo cyayo ngarukamwaka cyiswe “Ndi Uwe Live Concert – Edition 3” kizaba ku wa 17 Ukwakira 2026. Iki gitaramo kizabera muri New Life Bible Church, kikazaba ari ku nshuro ya gatatu gitegurwa hagamijwe kuramya no guhimbaza Imana binyuze mu ndirimbo n’ubutumwa bw’ibyiringiro.
Abagize Elayono Worship Family bavuga ko iki gitaramo kizahuza abakunzi b’umuziki wo kuramya baturutse mu bice bitandukanye, bakazagira umwanya wo gusenga, kuramya no kunezererwa mu buryo bwihariye. Ni igikorwa kimaze kuba umuco kuri iri tsinda, rikomeje kwagura umurimo waryo binyuze mu bitaramo bya Live.Insanganyamatsiko “Ndi Uwe”, isobanuye ko Imana ari yo yonyine ikwiye icyubahiro n’ikuzo, ninayo izagenderwaho muri iki gitaramo.
New Life Bible Church izakira igitaramo gikomeye cyo kuramya cyateguwe na Elayono Worship Family
Biteganyijwe ko hazaririmbwa indirimbo zitandukanye zifasha abantu kwegera Imana no gukomeza ukwizera kwabo.Abategura iki gikorwa batangaje ko imyiteguro iri kugenda neza, banasaba abantu bose kuzazinduka bakifatanya na bo muri uru rugendo rwo kuramya. Bagaragaza ko buri wese azagira amahirwe yo kwibonera ibihe by’umwuka byubaka ubuzima bw’abantu mu buryo budasanzwe.
“Ndi Uwe Live Concert” yagiye igira uruhare mu guhuza urubyiruko n’abandi bakristo mu mwuka umwe wo guhimbaza Imana. Binyuze muri ibi bitaramo byo kuramya, Elayono Worship Family ikomeje gushyira imbaraga mu kugeza ubutumwa bwiza ku bantu benshi hakoreshejwe impano z’umuziki.Abakunzi b’umuziki wa Gospel n’abifuza kwifatanya nabo muri iki gitaramo basabwe kubika itariki ya 17 Ukwakira 2026, bakazitabira “Ndi Uwe Live Concert Edition 3” izabera muri New Life Bible Church mu gikorwa gitegerejwe kuzaba cyuzuyemo kuramya, guhimbaza no kuzamurira Imana icyubahiro.
