Abakristu ntibagomba gushingira ubwiza bwabo ku isura n’imyaka_Papa Leo XIV
Umushumba wa Kiliziya Gatolika yasabye abakirisitu kudashyira ubwiza ku isura n’imyaka, ahubwo bakabushingira ku rukundo, ukwemera n’ubuzima bw’umutima
Papa Leo XIV yavuze ko umunsi mukuru w’Ijyanwa mu Ijuru rya Bikira Mariya ari umwanya wo kwibutsa abakirisitu ko ubwiza nyakuri bw’umuntu butagarukira ku isura cyangwa ku busore, ahubwo bushingira ku buzima bw’umutima, urukundo n’ukwemera. Ibi yabivugiye i Castel Gandolfo ku wa 15 Kanama 2026, mu birori by’Asomusiyo.
Papa Leo XIV yagaragaje ko Ijyanwa mu Ijuru rya Bikira Mariya ari rimwe mu mabanga akomeye y’ukwemera kwa Kiliziya Gatolika, kuko Mariya yizihizwa nk’uwajyanywe mu Ijuru ari umubiri n’umutima. Yavuze ko iri banga ritanga ishusho y’iherezo ry’ubuzima Imana iteganyiriza abayizera.
Mu butumwa bwe, Papa yifashishije amashusho gakondo agaragaza Bikira Mariya ari mu ikuzo, akikijwe n’urumuri, avuga ko ibyo bifasha abakirisitu gutekereza ku iherezo ry’urugendo rwa muntu. Yibukije ko Kristu ari we uyobora abamwizera ku buzima bw’iteka, nk’uko Mariya na we yagejejwe mu ikuzo ry’Ijuru.
Ubwiza nyakuri ntibupimirwa ku isura
Papa Leo XIV yagaragaje ko isura y’umuntu ihinduka uko imyaka igenda, ariko ko ibyo bidakuraho agaciro n’ubwiza bw’umuntu. Ahubwo, yavuze ko umuntu akwiriye kureba ubwiza burenze ibigaragara inyuma, cyane cyane ubwiza bushingiye ku rukundo no ku bikorwa byiza.
Yashimangiye ko Mariya ari urugero rw’umuntu wagejejwe ku ikuzo binyuze mu bumwe bwuzuye yagiranye na Kristu no mu rukundo yamugaragarije. Ibi bikaba bitanga isomo ku bakirisitu ko ubuzima bw’umuntu butagomba gupimirwa ku byo agaragaraho gusa, ahubwo no ku byo umutima we wera.
Papa yanibukije ko Ijyanwa mu Ijuru rya Mariya ari ikimenyetso cy’icyizere ku Bakristu, kuko ibyo babona muri Mariya nk’ubwuzure bw’ubuzima ari na byo bizaba iherezo ry’abazakira agakiza k’Imana. Yifashishije inyigisho ya Pawulo Mutagatifu ivuga ko Kristu azahindura umubiri wacu udafite ikuzo ukamera nk’umubiri we w’ikuzo.
“Urukundo ni rwo mutako mwiza”
Mu butumwa bwibanze ku gaciro k’umutima, Papa yashishikarije abakirisitu kudatwarwa n’ibipimo by’ubwiza bishingiye ku isura, kwishimisha no gushaka gushimisha abandi. Ahubwo yabasabye guha agaciro urukundo, ukwemera n’ibikorwa byiza.
Yagaragaje ko ubwiza bushobora kuboneka mu buzima bwa buri munsi, mu mwana, mu rubyiruko, mu bageze mu zabukuru ndetse no mu murimo umuntu akorera abandi. Muri ubwo buryo, ubutumwa bwe bwibutsa ko urukundo n’ubwitange ari byo biha ubuzima bw’umuntu ubwiza burambye.
Papa kandi yagarutse ku rugero rwa Bikira Mariya nk’umuntu wemeye umugambi w’Imana mu kwicisha bugufi. Yagaragaje ko ubuzima bwe bwerekana ko guhura n’Imana bitabera gusa mu bihe bidasanzwe, ahubwo bishobora kubaho no mu buzima busanzwe, binyuze mu kwemera, urukundo no kwitanga.
Mariya ni ikimenyetso cy’icyizere
Mu butumwa bwe nyuma ya Angelusi, Papa Leo XIV yavuze ko Bikira Mariya wajyanywe mu ikuzo ry’Ijuru ari “ikimenyetso cy’icyizere n’ihumure” ku bwoko bw’Imana. Yasabye ko ubusabe bwe bufasha cyane cyane abantu n’imiryango iri mu bihe bikomeye.
Papa yanasengeye abaturage bo mu Gihugu Cyera, abatuye Ukraine n’u Burusiya, ndetse n’abakirisitu bahura n’ivangura cyangwa gutotezwa kubera ukwemera kwabo. Yagaragaje kandi ko akomeje gusabira abaturage ba Colombia bahanganye n’ingaruka z’umutingito, asaba ko bose bitabaza Bikira Mariya mu isengesho.
Ubutumwa bwa Papa Leo XIV ku munsi mukuru w’Asomusiyo bwibanze ku isomo ry’uko agaciro n’ubwiza by’umuntu bitagomba gushingira ku isura cyangwa ku myaka, ahubwo ko bigaragarira mu mutima, mu rukundo, mu kwemera no mu buryo umuntu abaho afasha abandi. Ijyanwa mu Ijuru rya Mariya, nk’uko Papa yabigaragaje, rikomeza kuba ikimenyetso cy’icyizere ku bakirisitu berekeza ku buzima bw’iteka.
