Bethesda Holy Church: Light Worship Team yateguje abakunzi bayo ibihe bidasanzwe byo kuramya
Light Worship Team, itsinda ryo kuramya no guhimbaza Imana muri Bethesda Holy Church Rwanda, ryatangaje ko hari umushinga mushya w’amashusho n’umuziki ryitegura gushyira hanze, witwa “Nejtoa”.
Iri tsinda rikorera ku rusengero rwa Bethesda Holy Church, ruherereye Mugakinjiro ka Gisozi mu Mujyi wa Kigali, rizwi mu kuyobora gahunda zo kuramya no guhimbaza Imana mu materaniro asanzwe yo ku Cyumweru, mu birori byihariye ndetse no mu nama z’ivugabutumwa n’amaseminari agenewe gukomeza ubuzima bw’umwuka.Light Worship Team ni rimwe mu matsinda akorera umurimo wo kuramya no guhimbaza Imana muri Bethesda Holy Church Rwanda, aho rifasha abakirisitu kwinjira mu mwuka wo kuramya binyuze mu ndirimbo, amajwi n’imicurangire. Iri tsinda rigizwe n’abaririmbyi n’abacuranzi bafatanya mu gutanga ubutumwa bw’Ijambo ry’Imana binyuze mu muziki.
Usibye ibikorwa byo mu materaniro, iri tsinda rizwi no mu bikorwa byihariye birimo amaseminari nka “Wounds of Love”, aho ryagiye rifasha abitabiriye kuzirikana urukundo rw’Imana no kuyiramya. Ibi bikorwa biri mu murongo w’ivugabutumwa wa Bethesda Holy Church Rwanda, rigamije gukomeza ukwizera no gufasha abantu kwegera Imana. “Nejtoa” ije mu gihe amatsinda n’abahanzi ba Gospel mu Rwanda bakomeje kwagura ibikorwa byabo, bakoresha indirimbo, amashusho n’ibitaramo mu kugeza ubutumwa bwiza ku bantu benshi. Mu bihe bitandukanye, amatsinda nka Boanerges Gospel Group na Light Worship Team yagiye agaragaza uruhare rw’amatsinda yo mu nsengero mu guteza imbere umuziki wa Gospel no guhuza abakirisitu mu kuramya Imana.
Light Worship Team ikomeje gukoresha imbuga nkoranyambaga mu kugeza ku bakunzi bayo amakuru y’ibikorwa byayo, aho iboneka kuri TikTok no kuri YouTube ya Lightworshipteam Rwanda, ishyiraho amashusho y’indirimbo, ibikorwa byo kuramya ndetse n’ibindi bikorwa by’itorero.Abakunzi b’iri tsinda n’umuziki wo kuramya Imana bakomeje kwitegerezanya amatsiko umushinga “Nejtoa”, bitewe n’icyo uzaba uje kongerwa mu bikorwa by’ivugabutumwa bya The Light Worship Team. Iri tsinda ryatangaje ko umushinga uri hafi, rikaba ritegerejweho gutangaza andi makuru arimo igihe uzashyirwa hanze n’aho abakunzi bayo bazawubonera.
