Papa Leo XIV yashimangiye ubumwe n’agaciro k’imiryango muri Peru

Papa Leo XIV yagarutse muri Peru, igihugu yagizemo uruhare rukomeye mu butumwa bwa Kiliziya Gatolika mu gihe yamaze imyaka myinshi akorera muri iki gihugu nk’umumisiyoneri w’Umuryango w’Ab Augustini.

Uru ruzinduko rugaragaza umubano ukomeye afitanye n’Abanya-Peru ndetse n’urukundo afitiye igihugu yagizemo amateka akomeye y’ubuzima bwe bwa gisaserdoti.

Kuri uyu wa 10 Ugushyingo 2026, Papa yageze muri Peru, aho yakiriwe ku kibuga cy’indege cya gisirikare cya Callao.

Mu bikorwa byaranze umunsi wa mbere w’uruzinduko rwe, yagiranye ibiganiro na Perezida Keiko Fujimori, anageza ijambo ku bayobozi ba Leta, abahagarariye sosiyete sivile ndetse n’abadipolomate mu nzu mberabyombi ya Grand National Theatre i Lima.

Igikorwa cyagaragaje mu buryo bwihariye amarangamutima Papa afitiye iki gihugu cyabaye mu masaha y’umugoroba, ubwo yasohokaga kuri balkoni y’icyicaro cy’intumwa za Papa i Lima, azwi nka Apostolic Nunciature, agasuhuza imbaga y’abakirisitu yari yateraniye hanze kugira ngo imwakire.

Mu ijambo rye, Papa Leo XIV yashimiye Abanya-Peru uburyo bamwakiriye, agaragaza ko atiyumva nk’umushyitsi, ahubwo ko yumva agarutse mu rugo.

Yagize ati “Nagarutse mu rugo. Hano numva ndi mu rugo iwanjye.”

Aya magambo agaragaza ubucuti bukomeye Papa afitanye na Peru, igihugu yakoreyemo ubutumwa bwa Kiliziya Gatolika imyaka myinshi, mbere yo kugirwa Musenyeri wa Chiclayo.

Kuba yarabaye hafi y’abaturage, akamenya imibereho yabo n’ibibazo bahura na byo, byatumye iki gihugu gikomeza kugira umwanya wihariye mu buzima bwe.

Kwamamaza ubutumwa bw’amahoro no kubaka imiryango ikomeye na byo byagarutse mu ijambo rye.

Papa yasabye Abanya-Peru gukomeza gusengera amahoro, anabibutsa ko ukwemera kudakwiye kugarukira mu masengesho gusa, ahubwo kugomba no kugaragarira mu mibereho ya buri munsi, cyane cyane mu kubaka ubumwe mu miryango.

Yagize ati “Ni ingenzi cyane gutekereza ku miryango no gushaka uburyo bwo kwimakaza ubumwe mu miryango yacu.”

Mbere yo gusoza, Papa yayoboye abari aho mu isengesho rya Dawe uri mu Ijuru, abasabira umugisha kandi abifuriza ijoro ryiza. Yanasabye ko ibirori byakomeza mu rugero kugira ngo n’abaturanyi babashe kuruhuka neza.

Yasoje agira ati “Ijoro ryiza, tuzongera kubonana ejo.”

Uru ruzinduko rufite igisobanuro cyihariye ku Bakirisitu bo muri Peru, kuko rubaha amahirwe yo kongera guhura n’umushumba wahoze akorera mu gihugu cyabo.

Rushimangira umubano hagati ya Kiliziya Gatolika n’abaturage, cyane cyane mu bijyanye no guteza imbere amahoro, ubumwe n’imibereho myiza y’imiryango.

Mu gihe Papa akomeje ibikorwa by’uruzinduko rwe, Abanya-Peru bazaba biteze ubutumwa buzibanda ku mibereho yabo, ukwemera n’uruhare rwa Kiliziya mu gukemura ibibazo byugarije sosiyete.