Prosper Nkomezi yatangaje urugendo rw’ibitaramo muri Canada yise “Ibasha Gukora Live Concert”
Prosper Nkomezi yatangaje ko azakorera ibitaramo muri Canada mu rugendo yise “Ibasha Gukora Live Concert”Umuramyi Prosper Nkomezi ukomeje kumenyekana mu muziki wo kuramya no guhimbaza Imana, yatangaje ko ateganya gukora ibitaramo muri Canada, mu rugendo rwiswe “Ibasha Gukora Live Concert – Canada Tour”.
Ibi bigaragaza intambwe nshya mu kwagura umurimo we w’ivugabutumwa binyuze mu muziki, ukagera no ku bakunzi be batuye muri icyo gihugu.Prosper Nkomezi ni umwe mu baramyi nyarwanda bafite izina rikomeye mu muziki wa Gospel, by’umwihariko mu ndirimbo zo kuramya no guhimbaza Imana. Yatangiye urugendo rwe rw’umuziki nk’umuhanzi wabigize umwuga mu 2017, maze mu 2018 ashyira hanze album ye ya mbere yise “Sinzahwema Album, Vol. 1”, imufasha kurushaho kumenyekana.Mu myaka amaze mu muziki, uyu muramyi yashyize hanze album enye, anasohora indirimbo zakunzwe n’abatari bake.
harimo “Ibashagukora”, “Nzakingura”, “Wanyujuje Indirimbo” na “Witwa Jambo”. Izi ndirimbo zigaruka ku gukomera kw’Imana, ibyiringiro, kwizera ndetse no gushimira Imana ku byo ikorera abayizera.Yanakoranye n’abandi baramyi bakomeye barimo Israel Mbonyi, bahurira mu ndirimbo “Umusaraba” iri mu mushinga wa “Warandamiye”. Ubu bufatanye bwongereye imbaraga mu kumenyekanisha ibikorwa bye, cyane cyane mu bakunzi b’umuziki wo kuramya no guhimbaza Imana mu karere ka Afurika y’Iburasirazuba.
Uru rugendo rwa Canada rwiyongera ku bindi bikorwa mpuzamahanga Prosper Nkomezi amaze kugiramo uruhare, birimo ibitaramo yakoreye hanze y’u Rwanda. Mu mwaka wa 2026, yari afite kandi gahunda y’ibitaramo mu mijyi itandukanye yo muri Leta Zunze Ubumwe za Amerika, bigaragaza ko akomeje kwagura imbibi z’umurimo we.Nubwo itariki, aho ibitaramo bizabera n’andi makuru ajyanye n’uru rugendo rwa “Ibasha Gukora Live Concert – Canada Tour” bitaratangazwa, ifoto yamamaza iki gikorwa igaragaza ko andi makuru azatangwa mu gihe kiri imbere. Abakunzi b’uyu muramyi baba muri Canada n’abandi bazifuza kwitabira ibi bitaramo bakaba bategereje kumenya ibisobanuro birambuye by’uru rugendo.
