
Biramahire Abeddy yatsinze ibitego bitatu wenyine mu mukino we wa mbere
Rutahizamu w’Umunyarwanda, Biramahire Abeddy yatangiye yitwara neza mu ikipe ye nshya ya Entente Sportive Sétifienne ikina shampiyona y’icyiciro cya mbere muri Algeria mu mukino wo kwitegura umwaka mushya w’imikino.
Uyu musore yatsinze ibitego bitatu wenyine mu mukino ikipe ye ya Entente Sportive Sétifienne yatsinzemo AL SHELF FC ibitego bine kuri bitatu(4-3).
Ni umukino wabaye kuri uyu wa Gatanu wa tariki 08 Kanama 2025, nyuma y’iminsi mike uyu musore ukinira ikipe y’igihugu y’u Rwanda y’umupira w’amaguru (Amavubi) atangajwe nk’umukinnyi mushya.
Abeddy w’imyaka 26 yitwaye neza mu mwaka ushize w’imikino aho mu mikino yo kwishyura ya Shampiyona yakinnye mu mezi atanu yatsinze ibitego bitanu, mu gihe mu y’Igikombe cy’Amahoro yinjije ibitego bine.
Yakiniye amakipe nka Bugesera FC(2015–2016), Police F.C(2017–2018), Club Sportif Sfaxien(2018-2019), Mukura Victory Sports et Loisirs Football Club(2018-2019), Al-Suwaiq Club(2022-2023), A.S. Kigali Football Club(2023), União Desportiva do Songo(2023).