
UEFA Champions League: Bigoranye ikipe ya Liverpool yatsinze Atletico Madrid, PSG inyagira Atlanta
Imikino y’Umunsi wa Mbere wa UEFA Champions League wakomeje gukinwa, aho Liverpool yabonye igitego ku munota wa nyuma ikura intsinzi y’ibitego 3-2 kuri Atletico Madrid.
Ni imikino yakinwe mu ijoro ryo kuri uyu wa Gatatu, tariki ya 17 Nzeri 2025, Chelsea ikaba yatangiriye urugendo mu Budage ku kibuga cya Allianz Arena kiri i Munich.
Uyu ni umukino wari utegerejwe n’abakunzi b’umupira w’amaguru kuko wari uhuje amakipe abiri akomeye, kandi wari utegerejwemo ibitego.
Ku munota wa 20, Trevoh Chalobah wa Chelsea yitsinze igitego cya mbere cyabonetse muri uyu mukino, Harry Kane ashyiramo icya kabiri cya Bayern Munich kuri penaliti yagiyemo ku munota wa 27.
Nyuma y’iminota ibiri gusa Cole Palmer wa Chelsea yishyuye igitego kimwe ari na cyo cyabonetse mbere y’uko amakipe yombi ajya mu karuhuko. Mu cya kabiri Harry Kane yashyizemo icya gatatu cya Bayern Munich ku munota wa 63.
Iki cyayihesheje intsinzi y’ibitego 3-1, itangira neza irushanwa rya UEFA Champions League.
Undi mukino wari ukomeye muri iri joro ni uwa Liverpool yo mu Bwongereza na Atletico Madrid yo muri Espagne zakiniye ku kibuga cya Anfield cyo mu mujyi wa Liverpool.
Uyu wari umukino wa mbere wa rutahizamu wa Liverpool, Alexander Isak, wari utegerejwe na benshi. Si ibyo byishimo byo kubona uyu mukinnyi gusa ahubwo ku munota wa kane, iyi kipe yahise ibona igitego cyatsinzwe na Andrew Robertson.
Ku munota wa gatandatu, Liverpool yabonye igitego cya kabiri cyatsinzwe na Mohamed Salah nyuma yo guhabwa umupira na Ryan Gravenberch, icyizere gitangira kuzamuka.
Gusa ntiyakijyanye mu karuhuko k’igice cya mbere kuko mbere y’uko umusifuzi akirangiza, ku munota wa gatatu w’inyongera Marcos Llorente yashyizemo igitego cya mbere cyo kwishyura cya Atletico Madrid.
Uyu mukinnyi kandi yinjije igitego cyiza cya kabiri ku munota wa 80 w’umukino, nyuma y’ishoti rikomeye yatereye inyuma y’urubuga rw’amahina, bikangura Liverpool.
Koruneri yabonywe n’iyi kipe yari iwayo ku munota wa kabiri w’inyongera kuri 90, yavuyemo igitego cya gatatu cyashyizwe mu izamu na myugariro akanaba kapiteni wa Liverpool, Virgil van Dijk. Umukino wahise urangira ibonye amanota ya mbere.
Paris Saint-Germain ibitse igikombe cy’iri rushanwa giheruka, yanyagiye Atalanta ibitego 4-0, ihita inayobora urutonde rw’agateganyo rwaryo. Ni ibitego byatsinzwe na Marquinhos, Khvicha Kvaratskhelia, Nuno Mendes na Goncalo Ramos.
Uko indi mikino yagenze
Ajax 0-2 Inter Milan
Olympiacos 0-0 Pafos
Slavia Plague 2-2 FK Bodø/Glimt

PSG yatsinze Atlanta ibitego 4-0

Inter Milan yatsinze Ajax ibitego 2-0

Bayern Munich yatsinze Chelesea ibitego 3-1