Indashyikirwa mu Muziki wa Gospel: Ni Ayahe Matsinda y’Abakobwa Bavukana mu Rwanda?_Amafoto
Alicia na Germaine, Bonte na Bonnet, Hygette na Cynthia, Vestine na Dorcas ndetse na Blessed Sisters bari mu matsinda y’abakobwa bavukana akomeje kwigaragaza mu muziki wa Gospel mu Rwanda. Amateka yabo, impano n’uburyo bakurana umuco w’ubufatanye bituma bubaka amatsinda akomeye, mu gihe abahungu bo usanga bahuzwe n’imitima y’ubwigenge, amarushanwa yo kwiyubakira izina n’igitutu cy’imibereho, ibyatije umurindi icyuho kiri hagati y’amatsinda y’abakobwa n’aya basore.
Kuri ubu mu Rwanda hari amatsinda amaze kumenyekana, ari yo Alicia & Germaine, Bonte & Bonnet, Hygette & Cyntia na Vestine & Dorcas. Nta gushidikanya ko aya matsinda yose yigaruriye abakunzi b’indirimbo zo kuramya no guhimbaza mu Rwanda ndetse amwe yatangiye kwagura n’ibikorwa byabo hanze y’inkike zarwo.

Alicia na Germaine
Alicia na Germaine ni abavandimwe bakomoka i Gisenyi, mu Karere ka Rubavu, abahanzi bakiri bato ariko bakomeje kwigaragaza mu muziki wa Gospel. Bazwi cyane mu ndirimbo zirimo “Urufatiro”, “Rugaba”, “Wa Mugabo”, “Ihumure” na “Uri Yo”. Bari kwitegura gushyira hanze indirimbo nshya bise “Ibendera” izajya hanze mu ntangiriro z’Ukuboza 2025.
Umuryango wabo wagaragaje ko wabonye impano zabo bakiri bato, cyane cyane se wabo Innocent Ufitimana watangaje ko yababonye baririmba mu rugo akamenya ko bafite impano yo gushyigikirwa. Indirimbo yabo “Uri Yo” yabaye imwe mu zigaruriye imitima ya benshi kubera ubutumwa bwihariye bw’ihumure buyirimo, utibagiwe n’injyana yayo.

Bonte na Bonnet
Bonte na Bonnet ni abakobwa b’imyaka 16 na 13 bakomoka ku Kimisagara muri Kigali. Bazwi mu ndirimbo “Narababariwe” ndetse n’iyakurikiyeho “Izuba Ryange”. Amakuru yerekana ko banditse izi ndirimbo bifashishije abahanga batandukanye harimo Elyse Nshuti, Isaac Light Empire na Claude Mbarushimana.
Ubutumwa bwabo bushingiye ku guhumuriza abantu, kubabwira ko umwijima urangiye kandi ko izuba rishya ribagezeho. Umubyeyi wabo Sibomana Justin, umuvugabutumwa, na we yashimye impano yabo avuga ko bayikomora ku muryango wabo kubera ko na nyina ari umuririmbyi muri korali ya ADEPR Kimisagara. Uyu muryango ushishikajwe no gushyigikira abana babo mu rugendo rwabo rw’umuziki.

Hygette na Cynthia
Hygette na Cynthia ni impanga zageze mu muziki wa Gospel zifite intego yo gutera ikirenge mu cya Vestine & Dorcas. Indirimbo zabo nka Wera na Ni Wowe zakiriwe neza n’abakunzi b’umuziki wa Gospel.
Ubwabo bemeza ko Wera yanditswe na Niyo Bosco, umwe mu bahanzi n’abanditsi bazwi mu Rwanda. Abo bakobwa batangiranye n’amakorali, aho bamenyeye injyana n’uburyo bwo guhuza amajwi yabo y’impanga usanga afitanye isano ikomeye. Indirimbo yabo Ni Wowe yabaye intangiriro y’urugendo rw’itsinda ryabo, rihabwa icyizere ko rizazamuka kurushaho.

Vestine na Dorcas
Vestine na Dorcas ni bamwe mu batumye umuziki wa Gospel w’u Rwanda ugera ku rwego mpuzamahanga. Bazwi mu ndirimbo nka Yebo (Nitawale), Iriba, Simpagarara, Ihema, ndetse na Neema (mu rurimi rw’Igiswayile).
Indirimbo zabo nk’Ihema zagiye zishyirwa mu majwi ku mbuga zitandukanye biturutse ku butumwa bw’ihumure no kwiyegurira Imana bwibanda ku buzima bw’umukristo buyirimo. Abo bavandimwe bafashije kuzamura urwego rw’indirimbo zifite umwimerere ugezweho, hakiyongeraho ikoranabuhanga rigezweho mu gukora amajwi n’amashusho.

Blessed Sisters
Itsinda rya Blessed Sisters rigizwe n’abakobwa batatu bavukana ari bo Peace Benedata, Barinda Rebecca na Ashimwe Dorcas. Bakomoka mu Ntara y’Iburasirazuba mu Rwanda, ariko muri iyi minsi bose bari kubarizwa ku mugabane w’Uburayi nyuma y’uko bubatse ingo. Bamamaye mu ndirimbo “Araguhamagara”, “Wahanze u Rwanda” n’izindi.
Bafite agahigo mu muziki wa Gospel ko kuba ari bo batangije bwa mbere ibyo kuririmbana mu matsinda y’abakobvwa bavukana. Icyakora nyuma yuko barushinze, batangiye kugenda gacye mu muziki, gusa banyuzamo mu mwanya babonye bakaririmbira Imana. Urugero, hashize umwaka umwe bashyize hanze indirimbo nshya bise “Ushobora byose”.
Mu Rwanda, kuba amatsinda y’abakobwa bavukana akomeye mu muziki wa Gospel kandi nta tsinda ry’abasore bavukana rihari; Ubushakashatsi n’ukuri kw’imibereho y’abahungu n’abakobwa bigaragaza ko abakobwa bakura bafite imico y’ubufatanye, gusangira intego no gukemura amakimbirane mu mahoro, ibintu bituma bashobora gukorana neza kandi bakubaka itsinda rikomeye rifite “intego” imwe.
Amatsinda atanu y’abakobwa bavukana nka Vestine & Dorcas, Alicia & Germaine, Hygette & Cynthia, Bonte & Bonnet na The Blessed Sisters arabishimangira, kuko ubu nta tsinda ry’abasore bavukana rizwi ko rihari.
