Aho Ziri Tuzazifunga Bajye Basengera mu Rugo Rwose_Ahazaza H’insengero Zafunzwe
Nyuma y’isesengura rya RGB ryagaragaje ko insengero zisaga ibihumbi 9 zitujuje amabwiriza, Perezida Kagame yavuze ko atabona impamvu z’ingenzi zo kuzifungura, asaba abaturage kwibanda ku mirimo ibyara inyungu no kwirinda ububandi buvugwa muri zimwe muri zo.
Mu kiganiro yahaye abanyamakuru ku wa 27 Ugushyingo 2025, Perezida Paul Kagame yatangaje ko gufungura cyangwa gufunga insengero zitubahiriza amabwiriza ari icyemezo kigomba kureberwamo inyungu rusange z’igihugu, ashimangira ko nta ruhare rugaragara insengero zigira mu mibereho y’iterambere ugereranyije n’indi mirimo ishyigikira ubukungu.
Yagize ati: “Iyo biba jye nta nsengero nafungura. N’ibyo dukora tubikora kugira ngo abantu nyine… na ho insengero mu iterambere, muri ibi byose twavugaga by’intambara ziri ku Isi n’imibereho y’igihugu, insengero zifitemo ruhare ki?”
Ibi bitangaje nyuma y’isesengura ryakozwe n’Urwego rw’Imiyoborere mu Rwanda, RGB, ryerekanye ko muri Nyakanga kugera Kanama 2024 insengero zirenga 13,770 zasuzumwe, muri zo 9,171 zifungwa kubera kutubahiriza ibisabwa n’amategeko arebana n’umutekano, ubuzima n’imyubakire.
RGB yagaragaje ko mu gusubira kugenzura, hari insengero nke zagaragaye zujuje ibisabwa zemererwa kongera gukora, mu gihe imiryango 84 yasabye ko yafungurirwa, ariko 15 zisabwa kongera kuzuza ibisabwa naho 68 dosiye ziracyari kwigwa.
Perezida Kagame yakomeje agaragaza impungenge ku mikorere yo mu nsengero zimwe na zimwe, avuga ko habamo ubujura n’ububandi kandi ko nta mpuhwe abafitiye.
Ati: “Bariba, ariko muba hehe mwebwe? Jye ibyo mbona ko ari abantu buzuyemo ububandi gusa. Kurwana n’ababandi bari mu nsengero na byo nta mpuhwe mbifitiye na busa rwose… Mujye guhinga, mworore.”
Yibukije ko no mu bihe bya Covid-19 abantu basenze mu ngo nta kibazo, ndetse amadini menshi yakoresheje televiziyo, radiyo na serivisi za MoMo mu gukomeza ibikorwa byayo.
Ati: “Gusenga nushaka usengere kuri telefoni, aho byaturutse ntuhazi? Insengero zose ahantu ziri, ahubwo ni uko dushaka gushyira ibintu mu kuri, ntabwo dushaka guhutaza abantu…na ho hafunzwe nke.”
Ku kibazo cy’abava mu bice bitandukanye bakajya mu nsengero zifunguye bigateza umubyigano, Perezida Kagame yavuze ko n’aho bigaragara nk’aho ari ikibazo inzego zishinzwe imyemerere zizakomeza kugira ingamba zirimo no kuzifunga aho bibaye ngombwa.
“N’aho tuzazifunge ahubwo. Aho ziri tuzazifunga bajye basengera mu rugo rwose.”_Perezida Kagame
RGB iherutse gutangariza abagize Inteko Ishinga Amategeko ko ibikorwa byo gusuzuma insengero bigikomeje, hagamijwe kubungabunga umutekano n’ubuzima bw’abaturage.
Ibi bisobanuro bishya bishimangira ko politiki yo kugenzura insengero itazahagarara, ahubwo igamije kunoza imikorere yazo no gukumira ibyahungabanya imibereho y’abaturage.
