Ntawemerewe Kuba Umuhanzi Ku Giti Cye Ataruzuza Imyaka 18_Ibyo Wamenya Ku Mabwiriza Mashya Aherutse Gushyirwa Hanze na ADEPR
Pasiteri Ndayizeye Isaïe avuga ko kuyobora muri ADEPR atari umuhamagaro gusa, ahubwo bisaba n’ubumenyi bufasha mu nshingano z’imiyoborere n’ubwitabire bw’amategeko y’Itorero.
Umushumba Mukuru w’Itorero ADEPR, Pasiteri Ndayizeye Isaïe, yasobanuye ko impamvu abayobozi ba korali n’amatsinda y’abaririmbyi basabwa kuba bararangije ibyiciro runaka by’amashuri yisumbuye ari uko kuyobora abandi atari impano y’umwuka wera yonyine, ahubwo hakenerwa n’ubumenyi bwunganira uwo muhamagaro.
Ibi yabigarutseho ubwo yagiranaga ikiganiro na IGIHE, ubwo yasobanuraga amabwiriza mashya aherutse gushyirwa hanze agenga imikorere y’amakorali, amatsinda y’abaririmbyi n’abahanzi ku giti cyabo muri ADEPR.
Ayo mabwiriza mashya arimo ingingo zitandukanye zirimo ko ukeneye kwakirwa muri korali agomba kuba azi gusoma no kwandika, kuba atarahanwe n’ibyaha bya Jenoside cyangwa ingengabitekerezo yayo, amacakubiri n’ibindi byaha bidasaza.
Indi ngingo yavugishije benshi amagambo ni isaba abayobozi b’amakorari kuba bararangije nibura amashuri atandatu yisumbuye (A2) ku bayobozi bakuru, naho abandi bagize komite bakaba bararangije nibura amashuri atatu yisumbuye (A3).
Pasiteri Ndayizeye yagize ati: “Si ikibazo, ahubwo ni igisubizo. Tugomba kumenya ubushobozi umuntu akwiriye kuba afite kugira ngo abashe kuyobora abandi. Impano irahari, ariko n’amashuri arafasha mu kuyobora neza.”
Yakomeje avuga ko nubwo kuyobora ari impano y’umwuka wera, bitavanaho ko hakenewe ubumenyi bw’ibanze mu buyobozi. Ati: “Umuyobozi atanga raporo, akoresha inama, kandi ibyo ntibikorera mu mwuka gusa. Hari ubumenyi busabwa kugira ngo ibyo bikorwa bigende neza.”
Ku birebana no gusoma no kwandika, yasobanuye ko ADEPR ifite gahunda yo kwigisha gusoma, kubara no kwandika ku batabizi kandi ku buntu, bityo umuririmbyi ujya gufasha abandi mu ivugabutumwa akwiriye kuba afite ubwo bumenyi.
Ku ngingo ijyanye n’abana bato batemerewe kujya muri korali z’abantu bakuru bataragera ku myaka 18, yavuze ko ari ukubarinda imbogamizi zituruka ku kuremererwa n’itsinda ridahuye n’imyaka yabo. Ati: “Umwana w’imyaka irindwi ntashobora kwisanzura mu korali y’abakuru, hari byinshi byamubera imbogamizi.”
Ku birebana n’umuririmbyi ku giti cye ugomba kuba nibura afite imyaka 18 y’ubukure, arangwa n’imbuto z’umwuka wera kandi indirimbo ze zishingiye ku ijambo ry’Imana, Pasiteri Ndayizeye yavuze ko bigamije gutuma impano zikura mu buryo bukwiye. Yongeraho ko nubwo umwana ashobora gutangira kuririmba akiri muto, kugira ngo atangire gutumirwa ku giti cye bijyana no kugira imyaka imwemerera gukora ibyo mu buryo bwemewe.
Ati: “Twemera ko umuntu ashobora gutangira ivugabutumwa akiri umwana ariko kugira ngo ajye gutangira gutumirwa ku giti cye, ajye mu materaniro kujya kuvuga ubutumwa na byo hari imyaka y’ubukure bisaba kugira ngo tumufate nk’umuririmbyi ku giti cye ubasha kubikora mu buryo bwemewe n’itegeko akaba abasha kujya ajya mu materaniro wenyine yatumiwe.”
Aya mabwiriza mashya, akomeje kuganirwaho muri ADEPR no mu bakristo bayo, agamije kunoza imikorere y’amakorari n’amatsinda, no guteza imbere impano z’ubuhanzi mu murongo w’ivugabutumwa.
