Dr. Nicodème Hakizimana Ashimira Leta y’u Rwanda ku Migisha yagejeje ku Bafite Ubumuga bw’Uruhu
OIPPA (Organisation for Integration and Promotion of People with Albinism), umuryango uyoborwa na Dr Nicodème Hakizimana, yatangaje ko yishimira intambwe u Rwanda rumaze gutera mu kurengera no guteza imbere abantu bafite ubumuga bw’uruhu. Uyu muryango yawushingiye mu mwaka wa mbere wa Kaminuza, nyuma yo kubona imbogamizi zihariye abanyarwanda bafite ubumuga bw’uruhu bahuraga na zo.
Dr Nicodème Hakizimana afite impamyabumenyi y’icyiciro cya gatatu cya kaminuza (Master’s) muri “Education Planning, Management and Administration” ndetse na PhD muri Tewolojiya yakuye muri Minnesota Graduate School of Theology yo muri Leta Zunze Ubumwe za Amerika. Uyu muyobozi akaba n’umukristo muri Angilikani y’u Rwanda, ni umwanditsi w’ibitabo n’umuvugabutumwa ukunzwe. Yavukiye mu Karere ka Musanze mu Majyaruguru y’u Rwanda, ubu atuye i Kigali hamwe n’umuryango we.
Dr Hakizimana yavuze ko kimwe mu byamushimishije cyane mu bikorwa bya OIPPA ari uko ubuvugizi bwabo bwatumye amavuta arinda cancer y’uruhu ashyirwa kuri Mituweli. Aya mavuta ahenze cyane, aho umuntu ashobora gutakaza amafaranga agera kuri 45,000 Frw ku kwezi, bityo bikaba imbogamizi kuri benshi.
Uyu mwanditsi w’ibitabo akaba n’umuvugabutumwa, yatangaje ko kuba Leta yarashyize amavuta arinda cancer y’uruhu ku rutonde rw’imiti fatirwa kuri Mituweli ni intambwe ikomeye cyane. Twe abafite ubumuga bw’uruhu tudafite melanin, izuba ritwangiriza cyane rikadutera ibisebe bishobora kuvamo cancer.
Uyu muyobozi kandi yashimye gahunda nshya ijyanye no kunganira abanyeshuri bafite ubumuga bw’uruhu mu bizamini bya Leta. Ubu bazajya bahabwa inyandiko zanditse mu nyuguti nini, ndetse bongererwe igihe kugira ngo babashe gusoma no gusubiza neza. Yavuze ko mbere byabagoraga cyane, bamwe bakava no mu ishuri kubera kutabona neza ibyo mwarimu yanditse.
Yongeyeho ko hakiri imbogamizi mu turere tumwe na tumwe tutarabona ayo mavuta kuri Mituweli, asaba ko iki kibazo cyahita gikemurwa kugira ngo politiki ya Leta igerweho neza ku ngeri zose.
Undi mwanya w’ingenzi Dr Hakizimana yagarutseho ni ubusumbane bw’ubuvuzi kuri cancer y’uruhu. Yasabye ko buri Bitaro by’Akarere byashyirwamo umuganga wahawe amahugurwa ku byerekeye gusuzuma no kuvura cancer y’uruhu, kuko ari cyo kibazo gikomeye mu bafite ubumuga bw’uruhu.
Ku bijyanye n’ibitabo yanditse, Dr Nicodème ari gutegura kumurika igitabo cye gishya yise “Ubwami bw’Imana si ubw’amagambo”, gishingiye ku murongo wo mu 1 Abakorinto 4:20 uvuga ko “ubwami bw’Imana butari ubw’amagambo ahubwo ari ubw’imbaraga.” Avuga ko yanditse iki gitabo agamije gufasha abakristo n’ababwiriza Ijambo ry’Imana kugira ishingiro n’imbaraga mu murimo wabo.
Yagize ati: “Nifuza ko abakigisha Ijambo ry’Imana bacukumbura, bakagira ibyo babwira abantu bifite ishingiro. Umuvugabutumwa udafite ijambo riri muri we aba arimo guta igihe cy’abamwumva.”
Iki gitabo azakimurika ku wa 30 Ugushyingo 2025 kuri Hill Top Hotel i Remera, ahazaba hari abakozi b’Imana batandukanye barimo Rev. Isaie Ndayizeye, Umushumba Mukuru wa ADEPR; Rt Rev. Dr Jean Pierre Methode Rukundo, Bishop wa Karongi; ndetse na Rev. Prof Viateur Ndikumana, Umuyobozi wa Kaminuza ya Kibogora.
Iki gitabo gicuruzwa ahantu hatandukanye muri Kigali no mu ntara, nko kuri Ligue ku Kacyiru, mu isomero Ikirezi, muri EAR Musanze ndetse n’ahandi, kikaba kigura 10,000 Frw.
Ku bijyanye n’amatorero yafunzwe na RGB kubera kutuzuza ibisabwa, Dr Hakizimana yavuze ko ari gahunda nziza cyane, ariko yongeraho ko byaba byiza mu rwego rwa RGB hashyizwe umukozi wize tewolojiya kugira ngo gahunda zijyanye n’amadini n’imyemerere zirusheho kunozwa.
Yasoreje ku kibazo cy’amaturo, agaragaza ko hari abashumba bayakoresha nabi. Ati: “Amaturo yagombye gufasha imfubyi, abapfakazi n’abatishoboye. Ni byo Bibiliya ivuga. Kwigwizaho imitungo si cyo cyagenewe amaturo.”


