Umukinnyi Jean Claude Girumugisha yahagaritswe imikino itatu n’ihazabu ry’ibihumbi 5$
1 min read

Umukinnyi Jean Claude Girumugisha yahagaritswe imikino itatu n’ihazabu ry’ibihumbi 5$

Rutahizamu w’Umurundi uca ku mpande wa Al Hilal Omdurman yahagaritswe imikino itatu adakina n’ihazabu ry’ibihumbi 5$ kubera imyitwarire mibi yamuranze nyuma y’umukino batsinzemo MC Alger muri CAF Champions League.

Impuzamashyirahamwe y’umupira w’Amaguru muri Afurika, yahagaritse Rutahizamu Jean Claude Girumugisha nyuma yuko bigaragaye yagize imyitwarire mibi mu kibuga ku mukino batsinzemo MC Alger ibitego 2-1 muri CAF Champions League mu mukino wahereye mu Rwanda muri Stade Amahoro.

Amakuru ava mu kanama gashinzwe imyitwarire muri CAF ni uko hakozwe ubusesenguzi bwimbitse ku mukino, basanga Girumugisha atarateye amazi ku bagize MC Alger bari ku Ntebe y’abasimbura nk’uko byatangajwe mbere. Ahubwo Jean Claude Girumugisha yahawe igihano biturutse ku myitwarire idahwitse yagaragaje mu kibuga.

Uretse Girumugisha, Walid Sharshari wari ‘Performance Analyst’ yahagaritswe imikino itatu n’ihazabu ry’ibihumbi 5$, naho Al Hilal Omdurman icibwa ibihumbi 15$ biturutse ku mvururu zose zabaye nyuma y’umukino wabahuje na MC Alger.

Ubuyobozi bwa Al Hilal Omdurman bwatangaje ko bugiye kujuririra iki cyemezo ndetse ko bafite ibimenyetso simusiga byerekana ko nta makosa yakozwe na Girumugisha ndetse n’ikipe muri rusange.

Al Hilal Omdurman yakomeje ivuga ko bitarenze kuri uyu wa Gatanu tariki 28 Ugushyingo 2025 umunyamategeko wabo Pedro agomba kuba yagejeje ubujurire muri CAF ndetse ko mu gihe batahabwa ubutabera bazahita berekeza mu Rukiko rw’Ubujurire bw’Imikino ‘CAS’ .

Ntagihindutse Girumugisha azasiba imikino irimo; Saint Eloi Lupopo [bazagura kuri Iki Cyumweru] na Mamelodi Sundowns umukino ubanza n’uwo kwishyura.

Leave a Reply

Your email address will not be published. Required fields are marked *