Huye: Komisiyo y’Ubutabera n’Amahoro ya Diyosezi ya Butare yizihije Umunsi Mpuzamahanga w’Amahoro isaba kwimakaza amahoro arambye
3 mins read

Huye: Komisiyo y’Ubutabera n’Amahoro ya Diyosezi ya Butare yizihije Umunsi Mpuzamahanga w’Amahoro isaba kwimakaza amahoro arambye

CDJP Butare mu kwizihiza ku nshuro ya 59 Umunsi Mpuzamahanga w’Amahoro bifatanyije n’abakristu bo muri Paruwasi ya Higiro, hibandwa ku kwimakaza amahoro adashingiye ku iterabwoba n’intwaro

Kuri uyu wa Kane tariki ya 01 Mutarama 2026, Komisiyo y’Ubutabera n’Amahoro ya Diyosezi ya Butare yizihije Umunsi Mpuzamahanga w’Amahoro ku nshuro ya 59, mu birori byabereye muri Paruwasi ya Higiro.

Uyu munsi wizihijwe mu nsanganyamatsiko igira iti “Nimugire amahoro mwese: Twimakaze amahoro adashingiye ku iterabwoba no gukoresha intwaro,” hibandwa ku ruhare rw’amahoro mu gukemura amakimbirane, gukiza imitima yakomeretse no guteza imbere kwizerana, impuhwe n’icyizere mu muryango Nyarwanda.

Mu butumwa yatanze muri uyu muhango, Nyiricyubahiro Jean Bosco Ntagungira, Umwepiskopi wa Diyosezi ya Butare, yavuze ko Kiliziya yashyizeho uyu munsi mu rwego rwo kwibutsa ko amahoro ari inkingi ya ngombwa mu mibereho ya muntu.

Yagize ati “Muzirikane izina mwakwitwa mukumva ribabereye. Iyo abantu barebye abandi bakavuga bati ‘uriya ni umunyamahoro,’ nta gisingizo kiruta icyo. Kuba umunyamahoro ni ishema n’umugisha ku bandi.”

Yakomeje asobanura ko amahoro atari buri gihe byoroshye kugerwaho ku rwego mpuzamahanga, kuko hari ibibazo bikomeye birenze ubushobozi bw’abantu ku giti cyabo. Yatanze urugero ku ntambara zibera hirya no hino ku isi, agaragaza ko icyo abantu bashobora gukora ari ugusengera amahoro.

Ariko yashimangiye ko amahoro yo mu buzima bwa buri munsi ari inshingano ya buri wese, by’umwihariko mu miryango n’imibanire y’abantu.

Umwepiskopi Ntagungira yanagarutse ku mibereho y’abantu bari mu karengane n’ingorane zitandukanye, avuga ko abo bose bakeneye kugarurirwa amahoro, cyane cyane mu miryango yabo.

Ati “Urugendo rwa Komisiyo y’Ubutabera n’Amahoro si ugukora ibitangaza bidasanzwe, ahubwo ni ugufasha abantu kubona amahoro mu mutima, maze ayo mahoro bakayabiba no mu bandi.”

Yagarutse kandi ku musaruro watanzwe n’ibikorwa bya Komisiyo y’Ubutabera n’Amahoro, avuga ko hari imiryango myinshi yahoze mu makimbirane ikaba yarasubiranye amahoro, igatangira kubana neza.

Nyiricyubahiro Musenyeri Jean Bosco Ntagungira yifatanyije na CDJP Butare kwizihiza Umunsi Mpuzamahanga w’amahoro

Yanavuze ko hari abana b’abakobwa batewe inda bagatereranwa, ariko ubu bamwe muri bo bakaba barahujwe n’imiryango yabo babanye mu mahoro, bigizwemo uruhare rukomeye n’iyi Komisiyo.

Ibi byashimangiwe n’ubuhamya bw’umuryango wa Nkeshimana Jean Marie Vianney na Marie Gorethi Nyiraruvugo, bagaragaje ko mbere bari mu makimbirane akomeye yari yarabambuye amahoro, ariko nyuma yo kwegerwa no kwigishwa na Komisiyo y’Ubutabera n’Amahoro, bakaba barahindutse bagasubirana amahoro mu rugo rwabo.

Nkeshimana yavuze ko yahoze akoresha igitsure n’igitugu mu muryango, ariko akaza gusobanukirwa ko amahoro ashingira ku bwubahane no kuganira.

Umufasha we, Marie Gorethi Nyiraruvugo, yavuze ko nyuma yo kwigishwa basanze nta kibazo cyakemurwa n’intambara cyangwa amakimbirane, ahubwo ko kwizerana no kuganira ari byo byabafashije kugarura amahoro no kwakira umwana wabo wari waratewe inda, bakamufasha gusubira mu ishuri.

Uyu mwana na we yagaragaje ishimwe rikomeye, avuga ko yatekerezaga ko ubuzima bwe bwarangiye, ariko akaza kongera guhabwa icyizere n’ababyeyi be bafashijwe na Komisiyo y’Ubutabera n’Amahoro, ubu akaba yarasubiye mu ishuri kandi yitegura ejo hazaza heza.

Mu rwego rwo kwizihiza uyu munsi, Komisiyo y’Ubutabera n’Amahoro ya Diyosezi ya Butare yanatangije urugendo rw’isanamitima ku bumwe n’ubwiyunge muri Paruwasi ya Higiro, rugamije gutanga imbabazi no kuzisaba. Hanatangiwe igikorwa bise “Twugarire turugarijwe,” cyibanze ku gufasha no kuzirikana abana b’abakobwa bahohotewe bagaterwa inda.

Muri iyi Paruwasi ya Higiro habarurwa abana b’abakobwa barenga 60 batewe inda, bamwe muri bo bakaba baratangiye gusubizwa mu mashuri abandi bagashyirwa mu myuga, hagamijwe kubafasha kurera abana babo no kubaha amahirwe yo kubaka ejo hazaza heza binyuze mu mahoro n’ubwiyunge.

Leave a Reply

Your email address will not be published. Required fields are marked *